जनकपुर चुरोट कारखानाको डीडीए सम्पन्न, लेनादेना भए दाबी पेस गर्न आह्वान

काठमाडौँ । सरकारी स्वामित्वको जनकपुर चुरोट कारखाना लिमिटेडले बक्यौता तथा दायित्व फरफारक (लेनादेना)का लागि सरोकारवालालाई २१ दिनभित्र प्रमाणसहित दाबी पेस गर्न आग्रह गरेको छ।

कारखानाको सम्पत्ति तथा दायित्व मूल्याङ्कन (डीडीए) सम्पन्न भएपछि जारी सूचनामा ग्राहक, कर्मचारी तथा अन्य व्यक्ति वा संस्थालाई उद्योगसँग सम्बन्धित बाँकी हिसाब, बक्यौता, जग्गा रोक्का, बिमा र कर्मचारी सेवा सुविधासम्बन्धी दाबी भए तोकिएको अवधिभित्र सम्पर्क गर्न भनिएको छ।

मन्त्रिपरिषद्ले २०८२ वैशाख १५ गते कारखानामा रहेको सरकारी लगानी व्यवस्थापन गर्ने निर्णय गरेपछि अर्थ मन्त्रालयबाट खटिएको विज्ञ टोलीले डीडीए गरेको थियो। कारखानाले निर्धारित समयभित्र दाबी नआए प्रचलित कानुनअनुसार प्रक्रिया अघि बढाउने र म्यादपछि दाबी स्वीकार नगरिने जनाएको छ।

दाबी पेस गर्न धनुषाको जनकपुरस्थित कारखाना कार्यालयमा वा ९८४५१०५००८ नम्बरमा सम्पर्क गर्न सकिनेछ। साथै, कारखानाले सूचनामा उल्लेख गरेको इमेल ठेगानामार्फत पनि दाबी पेस गर्न सकिने व्यवस्था छ।