बिलबाट उपहार जित्ने अवसर, असोज ३१ भित्र विवरण प्रविष्टि गर्नुपर्ने

काठमाण्डौ । वस्तु तथा सेवा खरिदको बिल प्रविष्टि गरेर उपहार जित्न चाहने उपभोक्ताले असोज ३१ गते शनिबारभित्र विवरण दर्ता गर्नुपर्ने भएको छ। 

आन्तरिक राजस्व विभागले सञ्चालन गर्दै आएको करदाता प्रोत्साहन उपहार कार्यक्रमअन्तर्गत उक्त समयसीमाभित्र बिलको विवरण प्रविष्टि गर्न आग्रह गरेको हो।

विभागका अनुसार २०८३ असोज १६ देखि ३१ गतेसम्म नगद भुक्तानी गरी वस्तु तथा सेवा खरिद गरेका उपभोक्ता कार्यक्रममा सहभागी हुन सक्नेछन्। उनीहरूले कार्यक्रमको वेबसाइट मा गई खरिद बिलको विवरण प्रविष्टि गरेपछि उपहार कुपन प्राप्त गर्नेछन्।

पाक्षिक रूपमा सञ्चालन हुने यस कार्यक्रमको उक्त अवधिको उपहार कुपन कात्तिक १ गते खोलिने र विजेता घोषणा गरिने विभागले जनाएको छ।

पुरस्कार प्राप्त गर्न खरिद बिल अनिवार्य भएकाले उपभोक्तालाई सामान तथा सेवा खरिद गर्दा बिल लिन विभागले आग्रह गरेको छ। साथै, व्यवसायीलाई प्रत्येक बिक्रीमा अनिवार्य रूपमा बिल वा बीजक जारी गर्न अनुरोध गरेको छ।