बिर्तामोडमा एक क्विन्टलभन्दा बढी सडेगलेको माछा–मासु बरामद, खाल्डोमा गाडेर नष्ट

NEWS
बिहीबार, आश्विन २९,२०८३ 12:58:36

काठमाण्डौ । झापाको बिर्तामोडस्थित बिर्ता बजार र मुखिया बजारका माछा तथा मासु पसलमा गरिएको अनुगमनका क्रममा उपभोगका लागि अनुपयुक्त ठूलो परिमाणको माछा र मासु बरामद गरिएको छ।

बिर्तामोड नगरपालिकाका उपप्रमुख नगेन्द्रप्रसाद संग्रौलाको नेतृत्वमा बिहीबार गरिएको अनुगमनका क्रममा १९ वटा पसलबाट ८३ किलो मासु र २६ किलो माछा नियन्त्रणमा लिइएको हो। बरामद गरिएको माछा–मासु खाल्डोमा गाडेर नष्ट गरिएको नगरपालिकाले जनाएको छ।

अनुगमनका क्रममा केही पसलमा प्यान नम्बरलगायत व्यवसाय सञ्चालनका आवश्यक कागजातसमेत नभेटिएको जनाइएको छ। पटक–पटक सुधार गर्न आग्रह गर्दा पनि अटेर गर्ने व्यवसायीमाथि कारबाही प्रक्रिया अघि बढाइएको उपप्रमुख संग्रौलाले बताए।

उनका अनुसार उपभोक्ताको स्वास्थ्यमा प्रत्यक्ष असर पार्न सक्ने खाद्यवस्तुको बिक्री रोक्न तथा बजारलाई व्यवस्थित बनाउन अनुगमन गरिएको हो।

पशु सेवा कार्यालयका प्रमुख डा. शीतल भट्टराईले विगतका वर्षको तुलनामा पसलको सरसफाइमा केही सुधार देखिए पनि गुणस्तरहीन तथा सडेगलेका खाद्यवस्तु बिक्री गर्ने समस्या अझै कायमै रहेको बताए।

अनुगमन टोलीले खाद्यवस्तुको गुणस्तर, माछा तथा मासुको भण्डारण अवस्था, पसलको सरसफाइ र व्यवसाय सञ्चालनका लागि आवश्यक कागजातसमेत परीक्षण गरेको थियो।

अनुगमनमा उपप्रमुख संग्रौलासहित पशु सेवा कार्यालय, उपभोक्ता जागरण अभियान बिर्तामोड, इलाका प्रहरी कार्यालय बिर्तामोड र जिल्ला प्रशासन कार्यालय झापाका प्रतिनिधि सहभागी थिए।

माछा र मासु छिटो बिग्रने खाद्यवस्तु भएकाले उचित तापक्रममा भण्डारण र सरसफाइ कायम गर्न व्यवसायीलाई निर्देशन दिइएको नगरपालिकाले जनाएको छ। मापदण्डविपरीत कारोबार गर्ने व्यवसायीमाथि कानुनअनुसार कारबाही गर्दै बजार अनुगमनलाई निरन्तरता दिइने पनि नगरपालिकाले स्पष्ट पारेको छ।