चार दिन उपत्यकाको फोहोर व्यवस्थापन प्रभावित हुने

काठमाडौँ । दसैँका कारण आगामी कात्तिक १ गतेदेखि चार दिनसम्म काठमाडौँ उपत्यकाको फोहोर व्यवस्थापन प्रभावित हुने भएको छ।

काठमाडौँ महानगरपालिकाका अनुसार उपत्यकाको अन्तिम फोहोर व्यवस्थापनस्थल बञ्चरेडाँडामा कात्तिक १ देखि ४ गतेसम्म फोहोर व्यवस्थापनको काम प्रभावित हुनेछ। दसैँको मुख्य पर्वका अवसरमा सफाइ कर्मचारीहरू पनि पर्व मनाउन जाने भएकाले व्यवस्थापन कार्यमा असर पर्ने महानगरपालिकाले जनाएको छ।

यस अवधिमा घर, कार्यालय तथा व्यवसायबाट उत्पादन हुने फोहोरलाई कुहिने र नकुहिने गरी छुट्याएर छुट्टाछुट्टै राख्न महानगरपालिकाको वातावरण व्यवस्थापन विभागकी प्रमुख सरिता राईले आग्रह गरिन्।

उनले फोहोरलाई सडक तथा सार्वजनिक स्थानमा जथाभावी नफाल्न र आफ्नै घर वा कम्पाउन्डभित्रै व्यवस्थापन गर्न सबैलाई अनुरोध गरिन्।

महानगरपालिकाका अनुसार कात्तिक १ देखि ४ गतेबाहेक अन्य दिनमा भने फोहोर व्यवस्थापनको काम नियमित रूपमा सञ्चालन हुनेछ।