मोरङमा ब्राउन सुगरसहित तीन जना पक्राउ, प्रहरीको गोली लागेर दुई घाइते

काठमाडौं । मोरङको रतुवामाईबाट करिब ५०० ग्राम ब्राउन सुगर, घरेलु पेस्तोल र गोलीसहित तीन जना पक्राउ परेका छन्। पक्राउ पर्नेमा दुई भारतीय नागरिक र एक नेपाली छन्।

पक्राउ पर्नेमा भारतको बिहारस्थित अररिया जिल्लाका २२ वर्षीय दीपककुमार बोसाक र ४० वर्षीय पुरन बोसाक तथा रतुवामाई नगरपालिका–१ का ३५ वर्षीय प्रमोद ठाकुर छन्।

लागुऔषध ओसारपसारको सूचनाका आधारमा पुगेको प्रहरी टोलीले बुधबार राति रतुवामाई–६ शनिश्चरेमा दुई मोटरसाइकलमा सवार उनीहरूलाई रोक्न खोज्दा भागेपछि आठ राउन्ड गोली चलाएर नियन्त्रणमा लिएको हो। प्रहरीको गोली लागेर दुवै भारतीय नागरिक घाइते भएका छन्। उनीहरूको कोशी अस्पताल विराटनगरमा उपचार भइरहेको छ।

प्रहरीले उनीहरूको साथबाट करिब ५०० ग्राम खैरो हेरोइन, एक थान घरेलु पेस्तोल र एक राउन्ड गोली बरामद गरेको छ। बरामद मोटरसाइकलमध्ये एउटामा भारतीय नम्बर प्लेट बीआर ३७ भी ३९२६ रहेको छ।

मोरङ प्रहरीका प्रवक्ता डीएसपी मकेन्द्रकुमार मिश्रका अनुसार पक्राउ परेका तीनै जना लामो समयदेखि लागुऔषध कारोबारमा संलग्न रहेको आशंका छ। घटनाबारे थप अनुसन्धान भइरहेको प्रहरीले जनाएको छ।