वर्षा र पहिरोले काभ्रे, खोटाङ र ललितपुरका विभिन्न सडक अवरुद्ध

काठमाडौँ। लगातारको वर्षाका कारण खहरेखोलामा आएको बाढीले ढुङ्गामाटोसहितको लेदो सडकमा थुप्रिँदा तथा पहिरो खस्दा काभ्रे, खोटाङ र ललितपुरका विभिन्न सडकखण्डमा यातायात अवरुद्ध भएको छ।

प्रहरी प्रधान कार्यालयले आज जारी गरेको सूचनाअनुसार काभ्रे, खोटाङ र ललितपुरका चार स्थानमा सडक अवरुद्ध भएका हुन्।

काभ्रेको रोशी गाउँपालिका–९ पिन्थली र वडा नं. ८ गिम्दीबेँसीस्थित बिपी राजमार्गमा खहरेखोलाबाट ढुङ्गामाटोसहितको लेदो बगेर सडकमा थुप्रिएपछि यातायात पूर्ण रूपमा बन्द भएको छ।

त्यस्तै, खोटाङको हलेसी तुवाचुङ नगरपालिका–१ लाकुरीडाँडास्थित मध्यपहाडी लोकमार्गमा माथिबाट लेदोसहितको पहिरो खस्दा करिब १५ मिटर सडक अवरुद्ध भएको छ।

ललितपुर महानगरपालिका–२ सुन्दरीघाटमा बागमती खोलाको जलसतह बढेपछि बागमती खोला करिडोर सडकमा आवागमन रोकिएको छ। यसैगरी, बागमती गाउँपालिका–३ पाङ्दुर र टार्कुचेस्थित कान्ति लोकपथमा पहिरो खस्दा सडक पूर्ण रूपमा अवरुद्ध भएको प्रहरीले जनाएको छ।

सडक अवरुद्ध भएपछि ती मार्गमा यातायात सञ्चालन प्रभावित भएको छ।