भक्तपुरमा एलपी ग्यासको अभाव कायमै, महिनौँदेखि उपभोक्ता मारमा

काठमाडौं । जिल्ला प्रशासन कार्यालयले खाना पकाउने एलपी ग्यासको आपूर्ति सहज भएको दाबी गरे पनि भक्तपुरका उपभोक्ताले अझै सहज रूपमा ग्यास पाउन सकेका छैनन् । महिनौँदेखि ग्यासको प्रतीक्षामा रहेका उपभोक्ता एउटा भरिएको सिलिन्डरका लागि डिलर र खुद्रा पसल धाउन बाध्य छन् ।

भक्तपुरकी सविना बोहजुले तीन महिनादेखि ग्यास पाउन नसकेको गुनासो गरिन् । यसअघि आधा भरिएको सिलिन्डर पाए पनि त्यसयता अर्को सिलिन्डरको व्यवस्था हुन नसकेको उनले बताइन् । डिलरदेखि खुद्रा बिक्रेतासम्म पुग्दा पनि ग्यास नपाएको उनको भनाइ छ ।

त्यस्तै, सुनील दुवालले पनि लामो समयअघि ग्यासका लागि नाम टिपाए पनि अहिलेसम्म सिलिन्डर पाउन नसकेको बताए । पैसा तिरेर किन्न खोज्दा पनि ग्यास नपाइनु दुःखद भएको उनको गुनासो छ ।

यता भक्तपुरका प्रमुख जिल्ला अधिकारी विनोदकुमार खड्काले जिल्लामा ग्यासको आपूर्ति सहज भइसकेको दाबी गरे । एउटा कम्पनीको ग्यास नपाए अर्को कम्पनीको डिलरबाट सिलिन्डर साटेर लिन सकिने उनको भनाइ छ । दसैँअघि प्रशासनले ग्यास वितरण हुने स्थान र समयबारे सूचना सार्वजनिक गर्दै आए पनि आपूर्ति सहज भएको ठानेर त्यसलाई निरन्तरता नदिएको उनले बताए ।

प्रशासनले आपूर्ति सहज भएको बताए पनि उपभोक्ताले ग्यास नपाएको गुनासो गरिरहँदा बजारको वास्तविक अवस्था र सरकारी दाबीबीच भिन्नता देखिएको छ । वितरणको स्पष्ट सूचना अभावले समेत उपभोक्ता समस्यामा परेका छन् ।