विद्युत् प्राधिकरणमा ४०५ कर्मचारी माग, मंसिर १० सम्म आवेदन दिन सकिने

काठमाडौं । नेपाल विद्युत् प्राधिकरणले विभिन्न तहका ४०५ पदमा कर्मचारी भर्नाका लागि दरखास्त आह्वान गरेको छ । शुक्रबार प्रकाशित सूचनाअनुसार प्राधिकरणले अधिकृतस्तरमा ८३ जना र सहायकस्तरका विभिन्न पदमा ३२२ जना कर्मचारी माग गरेको हो ।

प्राधिकरणले प्रबन्धक, सहायक निर्देशक, सहायक प्रबन्धक, प्रशासनिक अधिकृत, लेखा अधिकृत, इन्जिनियर, चार्टर्ड एकाउन्टेन्टलगायत पदमा कर्मचारी माग गरेको छ । प्राविधिकतर्फ इलेक्ट्रिकल इन्जिनियर ४२, सिभिल इन्जिनियर पाँच, मेकानिकल इन्जिनियर चार, इलेक्ट्रोनिक्स इन्जिनियर तीन र कम्प्युटर इन्जिनियर चार जना माग गरिएको छ ।

त्यस्तै, सहायकस्तर तह ५ अन्तर्गत मिटर रिडिङ सुपरभाइजर ३१, लेखापाल ३४, सुपरभाइजर (इलेक्ट्रिकल) २४६, सुपरभाइजर (मेकानिकल) आठ र सुपरभाइजर (सिभिल) तीन जना माग गरिएको छ । यी पदमा प्रदेशगत रूपमा कर्मचारी भर्ना गरिनेछ ।

योग्यता पुगेका नेपाली नागरिकले आगामी मंसिर १० गतेसम्म प्राधिकरणको आधिकारिक वेबसाइटमार्फत अनलाइन आवेदन दिन सक्नेछन् । उक्त अवधिमा आवेदन दिन नसक्नेले दोब्बर दस्तुर तिरेर मंसिर १७ गतेसम्म दरखास्त पेस गर्न सक्ने प्राधिकरणले जनाएको छ ।