ज्येष्ठ नागरिकको सुविधा पाएपछि पूर्वउपप्रधानमन्त्री रायमाझी रिहा

काठमाडौं । नक्कली भुटानी शरणार्थी प्रकरणमा कैद सजाय भोगिरहेका पूर्वउपप्रधानमन्त्री टोपबहादुर रायमाझी बिहीबार रिहा भएका छन् । ६५ वर्ष उमेर पूरा भएपछि ज्येष्ठ नागरिकका रूपमा पाउने कैद छुट सुविधाअन्तर्गत उनी डिल्लीबजार कारागारबाट मुक्त भएका हुन् ।

रायमाझीलाई रिहा गर्न काठमाडौं जिल्ला अदालतले तिहारअघि नै संशोधित कैदीपुर्जी पठाएको थियो । ज्येष्ठ नागरिकले कैद सजायमा २५ प्रतिशत छुट पाउने कानुनी व्यवस्थाअनुसार उनलाई रिहा गरिएको कारागार प्रशासनले जनाएको छ ।

नक्कली भुटानी शरणार्थी प्रकरणमा दोषी ठहर भएका रायमाझी २०८० वैशाख २० गते पक्राउ परेका थिए । जिल्ला अदालत काठमाडौंले २०८३ असार ३० गते उनलाई चार वर्ष कैद सजाय सुनाएको थियो ।