मन्त्री निवासदेखि ग्रामीण सडकसम्मका आठ आयोजनाको ठेक्का तोड्ने तयारी

NEWS
बिहीबार, कार्तिक २६,२०८३ 15:17:58

काठमाण्डौ । वर्षौँदेखि निर्माण अघि नबढेका तथा कामको प्रगति सन्तोषजनक नभएका आठ आयोजनाको ठेक्का अन्त्य गर्ने प्रक्रिया अन्तिम चरणमा पुगेको छ। सहरी विकास तथा भवन निर्माण विभाग मातहतका यी आयोजनामा मन्त्री निवासका भवनदेखि ग्रामीण सडक र सहरी पूर्वाधारसम्म समेटिएका छन्।

विभागले रुग्ण आयोजनाको निर्माण सम्झौता अन्त्य गर्ने प्रक्रिया अघि बढाएको हो। यसअघि कात्तिक १७ मा भएको समीक्षा बैठकमा पनि आठ आयोजनाको ठेक्का अन्त्यको प्रक्रिया अन्तिम चरणमा पुगेको जानकारी दिइएको थियो।

पुल्चोकस्थित मन्त्री निवासमा सुरक्षा निकायका लागि निर्माण गर्नुपर्ने भवनको काम सम्झौता भएको छ वर्षभन्दा बढी बित्दा पनि अघि बढेको छैन। कबिन्द्र निर्माण सेवाले जिम्मा पाएको उक्त भवनको भौतिक प्रगति शून्य रहेको विवरणमा उल्लेख छ।

मन्त्री निवासकै मुख्य भवन निर्माणको अवस्था पनि कमजोर देखिएको छ। एएनके–कबिन्द्र जेभीले जिम्मा पाएको उक्त भवनको प्रगति २० प्रतिशतमा सीमित छ। यी दुईसहित लामो समयदेखि अलपत्र रहेका आठ आयोजनाका निर्माण सम्झौता अन्त्य गर्ने तयारी गरिएको हो।

सम्झौताअनुसार काम नगर्ने निर्माण कम्पनीमाथि ठेक्का अन्त्यसँगै धरौटी जफत र कालोसूचीसम्बन्धी कारबाही अघि बढाउने तयारीसमेत रहेको समाचारमा उल्लेख छ। मोबिलाइजेसन पेस्की लिएर पनि काम अघि नबढाउने तथा आयोजना लामो समयसम्म अलपत्र पार्ने कम्पनीमाथि कारबाही केन्द्रित हुने जनाइएको छ।

ठेक्का अन्त्यको प्रक्रिया पूरा भएपछि सम्बन्धित आयोजनाका बाँकी कामका लागि नयाँ ठेक्का आह्वान गर्ने मन्त्रालयको तयारी छ। नयाँ निर्माण कम्पनी छनोट गरेर अधुरा संरचना पूरा गर्ने लक्ष्य राखिएको छ।