नेप्सलाई प्राप्ति गरेको एनसीएचएलको एकीकृत कारोबार जेठ २१ देखि, भुक्तानी सेवा अवरुद्ध नहुने

NEWS
शुक्रबार, जेष्ठ १८,२०८१ 07:42:53

काठमाण्डौ । नेपाल ईलेक्ट्रोनिक पेमेन्ट सिष्टम्स् लिमिटेड (नेप्स) लाई प्राप्ति गरेको नेपाल क्लियरिङ्ग हाउस लिमिटेड(एनसीएचएल)को एकीकृत कारोबार जेठ २१ गतेदेखि सञ्चालन हुने भएको छ ।

प्राप्तिको प्रस्ताव सम्बन्धित नियमनकारी निकायहरुबाट स्वीकृती भएसँगै कम्पनीको एकीकृत कारोबार सुरु हुन लागेको हो । दुवै कम्पनीबीच गत चैत २२ गते सम्पन्न भएको अन्तिम सम्झौता दुवै संस्थाको वैशाख १३ गते सम्पन्न विशेष साधारण सभाबाट पारित भएको थियो । उक्त प्रस्तावलाई नेपाल राष्ट्र बैंकले गत जेठ २ गते र कम्पनीको रजिष्ट्रारको कार्यालयले जेठ १३ गते स्वीकृती प्रदान गरेको थियो ।

प्राप्तिपश्चात अब ‘नेपाल क्लियरिङ्ग हाउस लिमिटेड(एनसीएचएल)’को नामबाट एकीकृत कारोबार सञ्चालन हुन लागेको हो । कम्पनीको रजिष्टर्ड कार्यालय काठमाण्डौ महानगरपालिका–२८ कमलादीमा रहनेछ । दुवै संस्थाको एकीकृत कारोबार सुरु गरिँदा हुँने डेटा माईग्रेशन लगायतका कार्य गर्दा दुवै कम्पनीको कुनै पनि भुक्तानी सेवा अवरुद्ध नहुने जनाइएको छ ।

एनसीएचएल र नेप्सको चुक्ता पूँजी क्रमश रु.१ अर्ब ६६ लाख र रु.२१ करोड १२ लाख रहेकोमा प्राप्तिपश्चात एकिकृत संस्थाको चुक्ता पूँजी रु.१ अर्ब ६ करोड ५८ लाख पुगेको छ । एनसीएचएलको गत आर्थिक वर्ष २०७९/८० को खुद मुनाफा रु.३७ करोड ६८ लाख रहेको थियो भने नेप्सको रु.६ करोड ४६ लाख रहेको थियो ।