बैंकिङ प्रणालीको निक्षेप संकलन ६३ खर्ब नाघ्यो, एकैदिन ५ अर्बले बढ्यो कर्जा प्रवाह

BANKING
सोमबार, असार १७,२०८१ 14:22:05

काठमाण्डौ । बैंकिङ प्रणालीको निक्षेप संकलन ६३ खर्ब रुपैयाँ नाघेको छ । नेपाल राष्ट्र बैंकले सार्वजनिक गरेको नयाँ आँकडाअनुसार असार १२ गतेसम्म बैंकिङ प्रणालीमा ६३ खर्ब २ अर्ब रुपैयाँ निक्षेप संकलन रहेको छ ।

गत असार ११ गतेसम्म भने बैंकिङ प्रणालीमा ६२ खर्ब ९४ अर्ब रुपैयाँबराबरको निक्षेप संकलन रहेको थियो । यसरी १ दिनको अवधिमा बैंकिङ प्रणालीमा ८ अर्ब रुपैयाँ थपिएको छ । वाणिज्य बैंकहरुको निक्षेप संकलन पनि ८ अर्ब रुपैयाँले बढ्दै ५५ खर्ब ८१ अर्ब रुपैयाँ पुगेको छ । असार ११ गतेसम्म वाणिज्य बैंकहरुको निक्षेप संकलन ५५ खर्ब ७३ अर्ब रहेको थियो ।

असार १२ गतेसम्म अन्य वित्तीय संस्थाको निक्षेप संकलन भने स्थिर रहेको छ । अन्य वित्तीय संस्थामा ७ खर्ब २१ अर्ब रुपैयाँबराबरको निक्षेप रहेको राष्ट्र बैंकले जनाएको छ । यो अवधिमा कर्जा प्रवाह पनि वृद्धि भएको छ । असार १२ गतेसम्म बैंकिङ प्रणालीबाट कुल ५१ खर्ब ४५ अर्ब रुपैयाँबराबरको कर्जा प्रवाह भएको छ । असार ११ गतेसम्म भने ५१ खर्ब ४० अर्ब रुपैयाँबराबरको कर्जा प्रवाह भएको थियो ।

वाणिज्य बैंकहरुको बर्जा प्रवाह ४ अर्ब रुपैयाँले बढेर ४५ खर्ब ५१ अर्ब रुपैयाँ पुगेको छ ।

सिडी रेसियोमा झिनो गिरावट आउँदै ७९.५३ बाट घटेर ७९.५१ मा सीमित बनेको छ । अन्तर बैंक ब्याजदर भने ३ प्रतिशत कायम भएको छ ।