.gif)
_(1).gif)
.jpeg)
.png)
काठमाण्डौ । संघीय संसदको प्रतिनिधिसभा अन्तर्गतको अर्थ समितिले पूँजीबजारको विषयमा छलफल गर्न बिहीबार आयोजना गरेको बैठक बजारलाई प्रभावित पार्ने उद्देश्यमै केन्द्रीत रहेको आशङ्का बढेको छ ।
‘निकै गम्भीर छलफल गर्न’ भन्दै बोलाइएको बैठकमा सांसदहरुको कुरा सुन्नुबाहेक कुनै निर्णय भएन । निर्णय गर्नुपर्ने वा समितिका सभापतिबाट निर्देशन नै दिनुपर्ने विषय पनि केही उठेनन् ।
बजारका समस्या सुन्नलाई बैठक आयोजना गरिएजस्तो देखियो । अर्थसमितिका सदस्य समेत रहेका एक सांसदले बिजशालासँग भने ः सांसदहरुले बजार हल्लाको भरमा आफ्ना कुरा राखे । अधिकांशले राखेका कुरा आधारहीन, तुकहीन र बिनाअध्ययनका देखिन्थे ।
.gif)
निकै हतारोको साथ कारोबार समयमै बैठक आयोजना गरिनु, त्यहाँ आधारहीन कुराहरुलाई ल्याएर सांसदहरुले आफ्नो धारणा व्यक्त गर्नु र निश्कर्षबिना नै बैठक सकिनुले पनि शंका गर्ने ठाउँ बनाइदिएको छ ।
बिहीबारको बैठकमा दुई पूर्व अर्थमन्त्री डा. प्रकाशशरण महत र वर्षमान पुनले पनि आफ्नो धारणा राखेका थिए । उनीहरु अर्थमन्त्री भइसकेका कारण बजारको विषयमा अरुको तुलनामा सुझबुझपूर्ण धारणा नै राखेका थिए ।
डा. महतले आफूले सेयर बजार बढ्नै हुँदैन भनेर नभनेको स्पष्टीकरण दिएका थिए भने पुनले चाहिँ धितोपत्र बोर्डको अध्यक्ष नियुक्तिमा हुने सेटिंगको विषय उठाएका थिए ।
डा. महतले सो क्रममा बजारको फ्रन्टलाइन रेगुलेटर नेपाल स्टक एक्सचेञ्ज(नेप्से)लाई नै इन्साइडर ट्रेडिङमा सहभागी बनेको संगीन आरोप लगाएका थिए । आफूलाई धितोपत्र बोर्डबाट त्यस्तो सूचना आएको दाबी गर्न समेत उनले भ्याएका थिए ।
पूर्व अर्थमन्त्री पुन चाहिँ नयाँ स्टक एक्सचेञ्जलाई लाइसेन्स दिने विषयमा हुने लुछाचुँडी र सेटिंगको विषयमा बढी केन्द्रीत बनेका थिए । आफूले अनेकन प्रयास गर्दा समेत धितोपत्र बोर्डको अध्यक्ष नियुक्ति गर्न नसकेको उनले बताएका थिए ।
एमाले सांसद सूर्य थापाले सुरुवातमै बोल्दै ‘कारोबार समयमा बैठक किन राखेको ?’ भन्दै सभापति सन्तोष चालिसेलाई थर्काएका थिए । उनले कि त कारोबार हुनुअघि(बिहान) वा कारोबार भइसकेपछि यस्ता बैठक राख्नुपर्ने र बजार प्रभावित पार्ने उद्देश्यबाटै प्रेरित भएर यस्ता बैठक आयोजना गर्न नहुने बताएका थिए ।
आफ्ना कुरा राखेर उनी सहकारी ठगी छानबिन समितिको बैठक रहेको सूचना दिएर बाहिरिएका थिए ।
बैठकमा बोल्ने बाँकी सांसदहरुले विवेकी कुरा गरेनन् । सांसद मेटमणि चौधरीले केही कम्पनीको नामै तोकेर चलखेल गरी मूल्य माथि उचालिएको दाबी गर्न भ्याए । तर, त्यसका लागि उनले कुनै प्रमाण वा आधार चाहिँ पेश गर्न सकेनन् ।
बैठकमा बोलेका अन्य सांसद(सदस्य)हरुले पनि गतिला कुरा गरेनन् । बजारमा सुनिएका हल्लालाई आफ्नै ढंगले बैठकमा प्रस्तुत गरे ।
सांसदमध्ये अधिकांशले धितोपत्र बोर्डबाट डाकिएका प्रतिनिधिहरुलाई ‘यस्तो किन भएको ? यस्तो भनेको के हो ?’ जस्ता प्रश्नहरु सोधेका थिए ।
धितोपत्र बोर्डमा अध्यक्षको भूमिकामा रहेका महेश बरालले आफूहरुले गर्नसक्ने काम, नेप्सेले गर्नुपर्ने काम लगायतका विषयमा आफ्ना धारणा राखेका थिए । उनले धितोपत्र बोर्डमा पूर्ण अधिकारप्राप्त अध्यक्ष नहुँदा बजारमा कहीँकतै समस्या देखिए पनि धेरै गम्भीर भइहाल्नुपर्ने खालको समस्या नरहेको जिकिर गरेका थिए ।
उनले सांसदहरुले प्रश्न उठाउने क्रममा नबुझेका बजारका प्राविधिक विषयहरुमा समेत बुझाउन प्रयास गरेका थिए ।
सांसदहरुको प्रश्नहरु, धितोपत्र बोर्डका अधिकारीको जवाफ सुनेपछि सभापति चालिसेले केही निर्देशन दिनुपर्ने खालका कुराहरु नआएका र त्यस्तो केही गर्नुपरे सांसदहरुसँग छलफल गरेर अगाडि बढ्ने भन्दै बैठक टुङ्ग्याएका थिए ।
अर्थसमितिकी सदस्य सचिव रेखा उपाध्याय खनालले बिहीबारको बैठकमा सभापतिबाट निर्देशन नै दिनुपर्ने खालका कुराहरु नआएका प्रष्ट पारिन् । ‘मुख्य रुपमा माननीय सांसदहरुले प्रश्न उठाउनुभयो । धितोपत्र बोर्डका साथीहरुले उहाँहरुलाई चित्तबुझ्ने गरी जवाफ दिनुभयो । कसैलाई कुनै कन्फ्यूजन हुने अवस्था नै बनेन ।’ उनले बिजशालासँग भनिन्–‘आजको बैठक निर्देशन नै जारी गर्नुपर्ने खालको थिएन । बजार सुधारका लागि पर्याप्त नियामक निकायहरु छँदा छँदै संसदीय समितिले नै निर्देशन दिइहाल्छ भन्ने पनि देखिन्न ।’
बजारको समस्या समाधान र सुधारका लागि सभापति चालिसेले कुनै निर्देशन नदिएका र सांसदहरुसँग छलफल गरी केही भए भन्छु भनेर बैठक समाप्त गरेका उनको प्रष्टोक्ति थियो ।
बैठकको उपदेयता र औचित्यताको विषयमा प्रश्न गर्दा सभापति चालिसेले जवाफ दिन अस्वीकार गरे । ‘तपाईहरुले बजार प्रभावित पार्ने उद्देश्यले नै बैठक आयोजना गर्नुभएको हो ?’ भन्ने बिजशालाको आरोपमिश्रित प्रश्नमा न उनले उत्तर दिए, न त खण्डन नै गरे ।
.png)
.png)
(116).jpg)
(130).jpg)
.jpg)
.gif)
.gif)
.gif)
