गार्डियन माइक्रो लाइफ इन्स्योरेन्सको आइपीओले कति पाउला ओपनिङ्ग रेञ्ज ?

काठमाण्डौ । गार्डियन माइक्रो लाइफ इन्स्योरेन्सको आईपीओ बाँडफाँड भइसकेको छ । धितोपत्र बिक्री प्रबन्धक कुमारी क्यापिटलको कार्यालयमा आज बिहान कम्पनीको आईपीओ बाँडफाँड सम्पन्न भएको हो ।  

कम्पनीको आईपीओ कुल सदर भएको आवेदकमध्ये १ लाख ८४ हजार ५०० जनाले १० कित्ताका दरले प्राप्त गरेका छन् । सेयर पाउने लगानीकर्ताबीच यतिबेला कम्पनीको आइपीओले दोस्रो बजारमा कति ओपनिङ्ग रेञ्ज पाउला भन्ने जिज्ञासाको विषय बनेको छ ।  

कम्पनीले पहिलो कारोबारको लागि न्यूनतम १००.३४ रुपैयाँदेखि अधिकतम ३०१.०२ रुपैयाँसम्म ओपनिङ्ग रेञ्ज पाउने देखिएको छ । नेप्सेले जुनसुकै कम्पनीको पहिलो कारोबारको लागि ओपनिङ्ग रेञ्ज कम्पनीको वास्तविक नेटवर्थको आधारमा तोक्ने गर्दछ । नेप्सेले वास्तविक प्रतिसेयर नेटवर्थको तीनगुणासम्म ओपनिङ्ग रेञ्ज तोक्ने गर्दछ ।  

गार्डियन माइक्रो लाइफको आर्थिक वर्ष २०७९/८० को वास्तविक प्रतिसेयर नेटवर्थ १००.३४ रुपैयाँ रहेको छ । कम्पनीले आव २०८३/८४ सम्म नेटवर्थ १०४.११ रुपैयाँ पुग्ने प्रक्षेपण गरेको छ ।