विश्वका शीर्ष नेताहरुद्वारा अमेरिकी ट्यारिफ नीतिको विरोध, अष्ट्रेलियाले भन्यो, ‘यो मित्रको काम हुन सक्दैन’

काठमाण्डौ । अमेरिकी राष्ट्रपति ट्रम्पले करवृद्धिको घोषणा गरेपछि धेरै देशका नेताहरुले प्रतिक्रिया दिएका छन् । ट्रम्पले अप्रिल २ देखि विभिन्न देशमाथि ट्यारिफको सूचि सार्वजनिक गरेपछि विश्वका नेताहरुले प्रतिक्रिया जनाएका हुन् ।  

स्वीडेनका प्रधानमन्त्री उल्फ क्रिस्टर्सनले भन्छन्, ‘हामी बढ्दो व्यापारमा बाधा पुर्याउन चाहँदैनौं। हामी व्यापार युद्ध चाहँदैनौं। हामी अमेरिकासँग व्यापार र सहयोगको बाटोमा फर्कन चाहन्छौं, ताकि दुवै देशका जनताले राम्रो जीवन बिताउन सकून्।’

दक्षिण कोरियाका कार्यवाहक राष्ट्रपति हान दुक सुले विश्वव्यापी व्यापार युद्धको वास्तविकतालाई स्वीकार गर्दै यस व्यापार संकटसँग जुध्न सरकारले आफ्नो सबै क्षमता प्रयोग गर्नुपर्ने बताए । यस्तैकोलम्बियाका विदेश मन्त्री लौरा साराबियाले देशका उद्योग र निर्यातकर्तालाई जोगाउनका लागि यसतर्फ लागिपरेको बताइन् ।  

ब्राजिल सरकारले अमेरिकाले लगाएको करको बारेमा एक विज्ञप्ति नै जारी गरेको छ। उक्त विज्ञप्तिमा राष्ट्रिय हितको रक्षा गर्न विश्व व्यापार संगठनको सहारा सहित द्विपक्षीय व्यापारमा पारस्परिकता सुनिश्चित गर्न सबै सम्भावित कदमहरूको मूल्याङ्कन गरिरहेको जनाइएको छ।

अमेरिकाले दक्षिण कोरियामा २५ प्रतिशत र कोलम्बिया र ब्राजिलमा १० प्रतिशत कर लगाएको छ । यसैबीच, अष्ट्रेलियाका प्रधानमन्त्री एन्थोनी अल्बानीजले अमेरिकी ट्यारिफ अप्रत्याशित नभएको तर ती ुपूर्ण रूपमा अनुपयुक्त भने भएको टिप्पणी गरेका छन् ।  

उनले भने, ‘कर घोषणा गर्नुमा कुनै तर्क छैन। यो अष्ट्रेलिया र अमेरिकाको साझेदारीको विरुद्धमा जान्छ। यो कुनै मित्रको काम हुन सक्दैन।’