देश विकासका लागि सरकार र निजी क्षेत्र मिलेर अघि बढ्न आवश्यकः प्रधानमन्त्री ओली

काठमाण्डौ । प्रधानमन्त्री केपी शर्मा ओलीले देश विकासका लागि सरकार र निजी क्षेत्र मिलेर अघि बढ्नु पर्ने बताएका छन् । नेपाल उद्योग वाणिज्य महासंघको ५९ औँ वार्षिक साधारण सभा तथा उद्योग वाणिज्य दिवस २०८१ को उद्घाटनका अवसरमा बोल्दै प्रधानमन्त्री ओलीले यस्तो बताएका हुन् ।  

‘निजी क्षेत्र र  सरकार हातेमालो गर्दै अगाडि बढ्न सक्छ । यसको लागि सरकारलाई निजी क्षेत्रले बाध्य बनाउनु पर्छ । तर सरकारलाई बाध्य बनाउन आन्दोलन गरि राख्न आवश्यक छैन,’ ओलीले भने, ‘निजी क्षेत्र देश विकासका लागि सरकार कम्मर कसेर लागेको छ । सरकारको तर्फबाट पनि सोहि अनुसार सहयोग भई रहेको छ ।’

उक्त अवसरमा प्रधानमन्त्री ओलीले देशको अर्थतन्त्र अगाडि बढाउन,उद्योग  सञ्चालन, प्रवद्दन का लागि उत्कृष्ट नीति सरकारले बनाएको स्मरण गराए ।  

उनले अहिलेको सरकारको गठन देशमा स्थायित्व र सम्वृद्धि ल्याउनका लागि भएको समेत उनले बताए । ‘सरकार र सरकारका नीतिहरू छिटो बदलिने, उत्तरदायित्व बिर्सने, अर्को सरकारले ल्याएको राम्रो काम नसमेट्ने भन्ने मानसिकता यहाँ छ । यसलाई बदल्नु पर्छ ,’ प्रधानमन्त्रीले भने ।  

उनले अहिले आम्दानीले घर नचल्ने अवस्था नभएकाले नागरिकलाई बचत गर्न सिकाउन आवश्यक भएको औल्याए । यसो भयो भने मात्रै देश विकास हुने धारणा प्रधानमन्त्री ओलीले राखे ।  

यस्तै फरक प्रसंगमा उनले देशमा भ्रष्टाचारको अन्त्य र जनतालाई कसरी सहज तरिकाले सेवा दिन सकिन्छ भनेर लागिपरेको दाबी गरे ।