सेबोन अध्यक्ष र सञ्चालकलाई प्रहरीले गर्‍यो रेस्क्यू, खुमलटारमा ७ घण्टा के-के भयो ?

काठमाण्डौ । तरल राजनीतिक अवस्था, विभिन्न आन्दोलनका नाममा निजी क्षेत्र लक्षित आक्रमण र यी सबै घटनाक्रमबाट तर्सिएका लगानीकर्ताको कमजोर मनोबलका कारण सेयर बजार लगातार घटेपछि लगानीकर्ताहरुको एक समूहले आइतबार करिब ७ घण्टा पूँजीबजारको प्रमुख नियामक निकाय नेपाल धितोपत्र बोर्ड कब्जामा लियो । 

बजारमा प्यानिक सेल सुरु भई उच्च अंकले नेप्से घटेपछि तर्सिएका लगानीकर्ताहरुको एक समूहले आइतबार कारोबार समय सकिएलगत्तै खुमलटारस्थित धितोपत्र बोर्ड कार्यालयमा पुगेर बैठक बसिरहेका अध्यक्ष सन्तोषनारायण श्रेष्ठ र सञ्चालक समितिका सदस्यहरुलाई त्यहाँबाट बाहिर निस्कन नदिई राति १० बजेसम्म रोकेर राखेको हो ।  

सुरुमा लगानीकर्ताहरुले अर्थमन्त्रीले गठन गरेको पूँजीबजार सुधार कार्यदलले दिएका सुझावहरु कार्यान्वयनमा ढिलाई भएकोमा रोष प्रकट गरेका थिए । तर, उनीहरुको संख्या थपिएसँगै कार्यदलले सुझाएबाहेकका नयाँ ११ वटा र केहीपछि अझ बढाएर १५ वटा माग 'तत्कालै र आजै पूरा हुनुपर्ने' अडान लिएका थिए ।  

लगानीकर्ताहरुले विभिन्न १५ वटा माग प्रस्तुत गर्दै ती पूरा नभए आफूहरु पनि घर नजाने र धितोपत्र बोर्डका अध्यक्ष, सञ्चालक र त्यहाँ रहेका कर्मचारीलाई पनि घर जान नदिने भन्दै रातको समयमै बोर्डको गेटमा तालाबन्दी गरिदिएका थिए । मूलगेटमै ताला ठोकेर उनीहरुले बोर्डका अध्यक्ष, सञ्चालक र उच्चपदस्थ कर्मचारीहरुलाई अहिलेको अहिले माग पूरा गर्नुपर्ने निरन्तर दवाब दिएका थिए ।  

सो क्रममा बोर्ड पुगेका लगानीकर्ताहरु र धितोपत्र बोर्डका अध्यक्षबीच पटक पटक वादविवाद, चर्काचर्की र बहस भएको सुनिएको थियो ।  

लगानीकर्ताहरुले राखेका मागहरुमध्ये उचित देखिएका सबै विषय क्रमैसँग सम्बोधन गर्ने पटक-पटक प्रतिबद्धता जनाउँदा समेत धितोपत्र बोर्डका अध्यक्ष र सञ्चालकलाई कार्यालयबाट हिँड्न दिइएको थिएन । धितोपत्र बोर्डका अध्यक्षले लगानीकर्ताहरुले गरेका मागअनुसार धेरै विषय विगतमा आफूले सम्बोधन गरेको उल्लेख गर्दै अहिले उठेका मागहरु समेत सम्बोधन गर्ने प्रतिबद्धता जनाउँदा समेत लगानीकर्ताले उनलाई कार्यालयबाट बाहिर निस्किन दिएनन् ।  

रात छिप्पिदै गएपछि ठूलो संख्यामा सुरक्षाकर्मी समेत त्यहाँ तैनाथ भएका थिए । लगानीकर्ताहरु आफ्ना मागहरुको विषयमा बोर्डले लिखित सहमति गर्नुपर्ने, नभए घर नजाने अडानमा देखिन्थे ।  

लगानीकर्ताको संख्यासँगै मागहरु थपिँदै जाँदा र कतिपय लगानीकर्ता अराजक बन्ने अवस्था देखिएपछि त्यसको व्यवस्थापन गर्दै तिलक कोइराला, दीपेन्द्र अग्रवाल लगायतका लगानीकर्ताहरुले सहजीकरणको प्रयास गरेका थिए ।  

उनीहरुले पटक-पटक सेबोन अध्यक्षसँग छलफल गरी आफ्ना माग पूरा गर्ने लिखित वक्तव्य सेबोनले सार्वजनिक गर्नुपर्ने र आफूहरुले तिहारसम्मको समयसीमा दिएर आजको अवस्थालाई सहज बनाउने प्रतिबद्धता जनाएका थिए । सोहीअनुसार सेबोनले पूँजीबजार सुधार कार्यदलले दिएका सुधारहरुको शीघ्र कार्यान्वयनका लागि आइतबारको बोर्डले समेत निर्णय गरिसकेको र स्पष्ट कार्ययोजना समेत बनिसकेको उल्लेख गर्दै सेबोनले लगानीकर्ताहरुको बाँकी मागको विषयमा समेत आफूहरु सकारात्मक रहेको र क्रमैसँग जायज माग सम्बोधन गर्दै जाने प्रतिबद्धतासहितको वक्तव्य जारी गरेको थियो ।  

तर, सो वक्तव्यपछि पनि धेरै लगानीकर्ताले आफूहरुको माग 'आज नै पूरा हुनुपर्ने' र 'उधारो सहमति' नमान्ने भन्दै नाराबाजी गरेका थिए । केहीले लिखित वक्तव्यका फोटोकपीहरु च्यातेको समेत देखिएको थियो ।  

त्यसपछि लगानीकर्ताहरुले रातकै समयमा नाराबाजी गरेका थिए । उनीहरुले आफ्ना माग पूरा गर्नुको साटो आज झारा टार्ने काम मात्र भएको भन्दै अक्षरंश पूरा नभएसम्म बोर्ड परिसर नछाड्ने अडान लिएका थिए ।  

त्यहीबेला लगानीकर्ता दीपेन्द्र अग्रवालले तिहारसम्मको अल्टिमेटम दिएर आज घर जानुपर्ने प्रस्ताव गर्दा धेरैले त्यसको विरोध गरेका थिए । तर, अग्रवाल, लगानीकर्ता तिलक कोइराला, सुशील लुनिया लगायतको आह्वानमा धितोपत्र बोर्ड पुगेका लगानीकर्ता सम्झाइबुझाई गरेपछि केही मत्थर भएका थिए ।  

त्यही समयमा प्रहरीले धितोपत्र बोर्डका अध्यक्ष श्रेष्ठ र आजको बोर्ड बैठकका लागि त्यहाँ पुगेका सञ्चालकहरु तथा उच्चपदस्थ कर्मचारीहरुलाई आफ्नै भ्यानमा राखेर त्यहाँबाट घर पुर्याएको थियो ।