तिहारको मुखमा बेखर्ची भए सेबोनका कर्मचारी, अर्थले बेवास्ता गर्दा पीडामाथि पीडा

काठमाण्डौ । पूँजीबजारको प्रमुख नियामक नेपाल धितोपत्र बोर्ड(सेबोन)का कर्मचारीहरु तिहारमा बेखर्ची भएका छन् ।  

करिब एक महिनादेखि आन्दोलन गरिरहेका उनीहरु आफैंले लगातार पेनडाउन पनि गर्दै आएका छन् । प्रशासनिक कामकाज नै दैनिक रुपमा ठप्प हुँदा त्यसको मार आन्दोलनमा उत्रिने स्वयम् कर्मचारीहरुमाथि पनि परेको हो ।

 सेबोनका कर्मचारीहरु लामो समयदेखि अस्तित्वमा रहेको सुरक्षण तथा कल्याण कोष खारेजीका लागि अर्थमन्त्रालयबाट भएको नियोजित प्रहारविरुद्ध आन्दोलनमा छन् । अर्थ मन्त्रालयले २०८२ असोज २ गते एक पत्र पठाई ती कोषहरु खारेज गर्न, हालसम्म त्यसमार्फत लिइएका सेवासुविधा समेत फिर्ता(असूल उपर) गर्न भनेपछि आफूहरुमाथि अन्याय भएको महसुससहित सेबोन कर्मचारी आन्दोलनमा छन् ।  

अन्य विभिन्न सरकारी निकायहरुमा यस्तै खालका कर्मचारी कल्याणकोष अस्तित्वमा रहे पनि आफूहरुमाथि मात्र नियोजित र पूर्वाग्रही प्रहार भएको भन्दै उनीहरुले असोज २ को पत्र फिर्ता गर्न वा ती कोष खारेजीसम्बन्धी निर्णय फिर्ता लिन माग गर्दै आएका छन् ।

 उनीहरुले लामो समयदेखि माग राखे पनि अर्थमन्त्रालयले सुनेको छैन । बरु अख्तियारको आदेशको हवाला दिंदै निर्णय फिर्ता नहुने, उल्टो कर्मचारीलाई कारबाही गर्ने चेतावनी दिंदै आएको छ ।  

कर्मचारीहरु भने आफूहरु गर या मरको अवस्थामा रहेको भन्दै माग पूरा नभएसम्म आन्दोलन अन्त्य नहुने स्पष्ट अडानमा छन् । 

उनीहरुको  यही अडानका कारण सेबोनको दैनिक प्रशासनिक काम समेत ठप्प हुँदा तिहारको मुखैमा सबैको तलब निकासा हुन पाएन ।  

कर्मचारी कामकाज ठप्प पारेर आन्दोलनमा उत्रिएका कारण सम्बन्धित विभागले तिहारको मुखमा तलब पठाउने प्रक्रिया नै अगाडि बढाउन पाएन । स्रोतले भनेको छः ठूला कर्मचारीलाई त फरक नपर्ला, तर साना कर्मचारीलाई भने समयमा तलब निकासा नहुँदा निकै ठूलो समस्या परेको देखिएको छ ।  

धितोपत्र बोर्डमा ९६ कर्मचारी कार्यरत छन् । तिहारको मुखैमा महिना पूरा भएको र उनीहरुले असोजको तलब नपाएका समेत स्रोतले जनाएको छ ।  

'न्यायको लडाईका कारण हामीले तलब पाएनौं । तिहार खल्लो हुने भयो ।' आन्दोलनरत एक कर्मचारीले भने-'भोलिको दिनमा सरकारले खाएको तलब पनि फिर्ता गर भन्यो भने के गर्ने भन्ने नयाँ तनावमा हामी छौं ।'