आज १० बजेदेखि जेनजी लगानीकर्ताले सेबोन घेर्दै

File Photo

 

काठमाण्डौ । जेनजी लगायतका लगानीकर्ताहरुले सेयर बजार सुधार र यो क्षेत्रमा व्याप्त भ्रष्टाचार अन्त्यको माग गर्दै आज प्रदर्शन गर्ने भएका छन् ।  

जेनजी युवाहरुको अगुवाईमा आज(बुधबार) नेपालको पूँजीबजारको प्रमुख नियामक नेपाल धितोपत्र बोर्ड(सेबोन)मा पुगेर कार्यालय घेराउ गर्दै प्रदर्शन गर्ने कार्यक्रम राखिएको हो । 

'नेपाल धितोपत्र बोर्डमा व्याप्त नीतिगत भ्रष्टाचारविरुद्धको लडाईमा हामी सबै संयुक्त जेनजी युवा, लगानीकर्ता, अभियन्ता र सरोकारवालाहरुलाई एकजुट हुन आह्वान गर्दछौं ।' आन्दोलन संयोजन समितिले प्रकाशित गरेको सूचनामा भनिएको छः 'नेपालको पूँजीबजारलाई अझ बलियो, सुरक्षित, पारदर्शी र लगानीमैत्री बनाउन तपाईहरुको उल्लेखनीय सहभागिता र समर्थन आवश्यक छ । यसरकाण, हामी सबै मिलेर एक सफा, पारदर्शी र बलियो पूँजी बजारको निर्माणमा जुटौं ।' 

लगानीकर्ताहरुलाई बिहान १० बजे खुमलटारस्थित सेबोन कार्यालय पुग्न भनिएको छ । त्यहाँ आज विशेष प्रदर्शन हुने बुझिएको छ ।  

यसअघि यो समूहले विभिन्न २८ बुँदे माग प्रस्तुत गर्दै ती पूरा नभए आन्दोलन थाल्ने चेतावनी दिएको थियो । तर, माग राख्ने समूहसँग धितोपत्र बोर्डले वार्ता वा छलफल गरेन । जसका कारण बाध्य भएर आफूहरुले प्रदर्शन गर्न थाल्नुपरेको आयोजकको भनाई छ ।