केपी ओलीको 'अत्याचार'विरुद्ध उपमहासचिवले दर्ता गराए नोट अफ डिसेन्ट

काठमाण्डौ । नेकपा (एमाले) ले प्रतिनिधिसभा निर्वाचनका लागि गरेको उम्मेदवार टिकट वितरण निर्णयप्रति पार्टीका उपमहासचिव योगेश भट्टराईले औपचारिक असहमति जनाएका छन्।

उनले आज आइतबार पार्टी केन्द्रीय कार्यालयमा पुगेर लिखित रूपमा ‘नोट अफ डिसेन्ट’ (फरक मत) दर्ता गराएको एमालेका एक उच्च स्रोतले जानकारी दिएको छ।

गत शनिबार बसेको सचिवालय बैठकले देशभरका १४० निर्वाचन क्षेत्रका उम्मेदवारको टुंगो लगाएको थियो। उक्त निर्णयप्रति असन्तुष्टि जनाउँदै भट्टराईले बैठकमा नै फरक मत लेख्ने बताएका थिए। सोहीअनुसार उनले चार मुख्य बुँदामा असहमति राख्दै नोट अफ डिसेन्ट दर्ता गरेका हुन्।

उनले उठान गरेका प्रमुख असहमति बुँदाहरू निम्नानुसार छन्:

-टिकट वितरणमा निर्धारित मापदण्डको पालना नभएको

-उम्मेदवार छनोट प्रक्रियामा पक्षपातपूर्ण व्यवहार देखिएको

-योग्य तथा सक्रिय पार्टी कार्यकर्तामाथि अन्याय भएको

-बाह्य चुनौती र समग्र राजनीतिक परिस्थितिको पर्याप्त मूल्यांकन नभएको

विशेष गरी, उपमहासचिव भट्टराईले लामो समयदेखि आफूले प्रतिनिधित्व गर्दै आएको ताप्लेजुङ निर्वाचन क्षेत्रको उम्मेदवार अझै टुंगो नलागेको विषयलाई पनि गम्भीरतापूर्वक उठाएका छन्।

यसैबीच, निर्णय सार्वजनिक भएलगत्तै सामाजिक सञ्जालमार्फत समर्थक तथा कार्यकर्तालाई सम्बोधन गर्दै भट्टराईले भनेका छन्,

“निर्णयले हामीलाई कुनै पनि हालतमा विचलित हुन दिनुहुँदैन। झन् उच्च मनोबल र एकताका साथ नेकपा (एमाले) का सबै उम्मेदवारहरूलाई विजयी बनाउन आफ्नो ठाउँ र हैसियतबाट सक्रिय रहन अनुरोध गर्दछु। हाम्रो यात्रा लामो र गौरवपूर्ण छ।”

यो घटनाले एमालेको आन्तरिक एकता र टिकट वितरण प्रक्रियामा रहेको मतभेदलाई फेरि एकपटक प्रष्ट पारेको छ। पार्टीका शीर्ष नेतृत्वले यस असहमतिलाई कसरी सम्बोधन गर्छ भन्नेमा सबैको ध्यान केन्द्रित भएको छ।