गृहमन्त्री अर्याललाई राष्ट्रियसभा सदस्यमा सिफारिस गर्ने सरकारको निर्णय

काठमाण्डौ । सरकारले गृहमन्त्री ओमप्रकाश अर्याललाई राष्ट्रियसभा सदस्यका लागि सिफारिसको निर्णय गरेको छ ।  

आइतबार बसेको मन्त्रिपरिषद बैठकले जेनजी आन्दोलनपछि सफलतापूर्वक गृहप्रशासन चलाएका र शान्तिपूर्ण निर्वाचन गराएको श्रेय पाएका गृहमन्त्री अर्याललाई राष्ट्रियसभा सदस्यमा नियुक्तिका लागि राष्ट्रपतिसमक्ष सिफारिस गर्ने निर्णय गरेको हो ।

राष्ट्रियसभामा एक सदस्य पद रिक्त रहेको छ । यो पदमा प्रधानमन्त्रीले अर्याललाई र राष्ट्रपतिले आफ्नै छोरीलाई पठाउन खोजेका थिए । यो रस्साकस्सीबीच वर्तमान अर्थमन्त्री रामेश्वर खनालले विभिन्न पावर सेन्टरहरु प्रयोग गरी प्रधानमन्त्रीलाई आफ्नो नाम सिफारिस गर्न लगाउने प्रयासमा रहेका समाचारहरु बाहिरिएका थिए । यद्यपि यस्ता समाचारहरुको विषयमा अर्थमन्त्रीले पछि विभिन्न सञ्चारमाध्यमबाट खण्डन गर्न खोजेका थिए । 

अब सरकारले सिफारिस गरेअनुसार राष्ट्रपति रामचन्द्र पौडेलले अर्याललाई राष्टियसभा सदस्य पदमा नियुक्त गर्नुपर्नेछ ।  

राष्ट्रपतिले मनोनयन गरेपछि अर्याल समेत अब बन्ने मन्त्रिपरिषदमा बलियो मन्त्रालयको दाबेदार बन्नसक्ने विश्लेषण गरिएको छ ।