आरविवि मर्चेण्टको लगानीकर्ता शिक्षा तथा सचेतना कार्यक्रम सम्पन्न

काठमाण्डौ । आरविवि मर्चेण्ट बैंकिङ्ग लिमिटेडले ग्लोबल मनि विक २०२६ को अवसरमा विभिन्न कलेजहरुमा वित्तीय शिक्षा अभिबृद्धिको लागि सचेतनामूलक कार्यक्रम गरेको छ ।  

धितोपत्र बजार तथा वस्तु विनिमय बजार सम्वन्धी देशव्यापीरुपमा वित्तीय साक्षरता तथा लगानीकर्ता सचेतना अभिबृद्धि गर्नका लागि नेपाल धितोपत्र बोर्डले बालबालिका तथा युवाहरुमा वित्तीय साक्षरता अभिवृद्धि गर्देै वित्तीय ज्ञान, सिप र मनोवृतिको विकास गर्ने उद्देश्यले ‘स्मार्ट मनि टक्स’  भन्ने नाराका साथ ग्लोबल मनि विक चैत्र २ गते देखि ८ गते सम्म देशभरी विभिन्न कार्यक्रम आयोजना गरी मनाएको छ ।

यही अवसरमा आरविवि मर्चेन्टले चैत्र ८ गते नवोदित कलेज, सामाखुसी, काठमाडौंमा प्लस टु तथा स्नातक तहमा अध्यनरत विद्यार्थीहरु तथा प्राध्यापकहरुको लागि वित्तीय शिक्षा अभिबृद्धिको लागि सचेतनामूलक कार्यक्रम आयोजना गरि सफलतापूर्वक सम्पन्न गरेको हो । उक्त सचेतनामूलक कार्यक्रममा कलेजका प्राध्यापक लगायत अध्यनरत विद्यार्थीहरुको उल्लेख्य उपस्थिति रहेको थियो ।  

आरविवि मर्चेन्ट बैंकिङ्ग लिमिटेडको तर्फबाट कम्पनीको प्रमुख कार्यकारी अधिकृत बद्रि प्रसाद प्याकुरेल, सहायक प्रबन्धक श्री सृजना बास्कोटा र बरिष्ठ अधिकृत राम नारायण तिवारीले कार्यक्रम संचालन गरेका थिए ।  

साथै, छलफलमा उठेका प्रश्नहरुको जवाफ सृजना बास्कोटा तथा राम नारायण तिवारीले दिएका थिए । ग्लोबल मनि विकको अवसरमा आयोजित यस कार्यक्रमले पूँजीबजार सम्बन्धी शिक्षा तथा सचेतना अभिबृद्धि गर्ने र सहभागीहरुले सेयर लगानी सम्बन्धि ज्ञान हासिल गरि लाभान्वित भएको कम्पनीले विश्वास गरेको छ ।