(2).gif)
.png)
काठमाण्डौ । अर्थमन्त्री डा. स्वर्णिम वाग्लेले पदभार ग्रहण गरेपछि पहिलो पटक निजी क्षेत्रका प्रतिनिधिसँग औपचारिक भेट गरेका छन् । गत शुक्रबार सपथ ग्रहण गरेका वाग्लेले सोमबार नेपाल उद्योग वाणिज्य महासंघका अध्यक्ष चन्द्रप्रसाद ढकालसहितको टोलीसँग भेटवार्ता गरेका हुन् ।
भेटमा अर्थमन्त्री वाग्लेले निजी क्षेत्रलाई सहज वातावरण दिने प्रतिबद्धता जनाएका छन् । उनले भने, “म घुस खान आएको होइन, कसैलाई घुस खान पनि दिन्न । म अर्थतन्त्रको जहाज मोडेर देशलाई नयाँ गतिमा लैजान आएको हुँ ।” उनले कसैले पनि काम गराउन घुस ख्वाउनु नपर्ने, कामकाजमा लाइन बस्नु नपर्ने र व्यापारीहरू थुनिनु नपर्ने स्पष्ट पारेका छन् ।
वाग्लेले राज्य र निजी क्षेत्रबीचको सम्बन्धलाई ‘सहयात्री’ को रूपमा परिभाषित गर्दै भने, “निजी क्षेत्रले अब दुःख पाउँदैन, हामी तपाईंहरूका सहयात्री हौँ ।”
आर्थिक अनियमितताको विषयमा उनले महत्वपूर्ण नीतिगत घोषणा गरेका छन् । “आर्थिक बेइमानीमा हामी अब आर्थिक जरिवानामा जान्छौँ, उद्योगी व्यापारी थुनिनु पर्दैन,” उनले भने । तर नियोजित बेइमानी गर्नेलाई भने निर्मम कारबाही गरिने चेतावनी पनि दिएका छन् ।
यो भेटलाई निजी क्षेत्रले सकारात्मक रूपमा लिएको छ । अर्थमन्त्री वाग्लेको यो अभिव्यक्तिले व्यवसायीहरूमा राहत र उत्साह जगाएको देखिन्छ ।
.png)
.jpg)
