प्राधिकरणका तत्कालीन आयुक्त तिवारीविरुद्ध १०.५४ करोडको भ्रष्टाचार मुद्दा, आयभन्दा बढी सम्पत्ति आर्जनको आरोप

काठमाण्डौ । काठमाण्डौ उपत्यका विकास प्राधिकरणका पूर्व विकास आयुक्त भाइ काजी तिवारीविरुद्ध अस्वाभाविक सम्पत्ति आर्जन गरेको आरोपमा मुद्दा दायर भएसँगै सार्वजनिक पदमा पारदर्शिता र उत्तरदायित्वको विषय फेरि चर्चामा आएको छ।

अख्तियार दुरुपयोग अनुसन्धान आयोगले लामो अवधिको आर्थिक गतिविधि विश्लेषणपछि तिवारीको आय–व्ययबीच ठूलो अन्तर देखिएको निष्कर्ष निकालेको छ। आयोगका अनुसार २०४४ भदौ १९ देखि २०७८ वैशाख ९ सम्मको अवधिमा तिवारीले करिब १४ करोड ५१ लाख रुपैयाँ वैधानिक आम्दानी गरेका छन्। तर सोही अवधिमा उनको खर्च तथा लगानी २५ करोडभन्दा बढी देखिएको छ, जसले स्रोत नखुलेको ठूलो रकमको संकेत गर्छ।

यस आधारमा आयोगले करिब १० करोड ५४ लाख रुपैयाँ बराबरको गैरकानुनी सम्पत्ति आर्जन गरेको आरोप लगाउँदै भ्रष्टाचार निवारण ऐन, २०१७ अन्तर्गत मुद्दा दायर गरेको हो। आयोगले सार्वजनिक पदको दुरुपयोगमार्फत सम्पत्ति आर्जन गरिएको दाबी गरेको छ।

मुद्दामा तिवारीका परिवारका सदस्यहरूलाई पनि समेटिएको छ। उनकी श्रीमती मिना देवी तिवारी र छोरी मीरा तिवारीलाई प्रतिवादी बनाउँदै विशेष अदालत मा आरोपपत्र दायर गरिएको आयोगले जनाएको छ।