सानिमा रिलायन्स लाइफद्वारा कालिकोटका विपद् प्रभावितलाई कम्मल वितरण

काठमाण्डौ । सानिमा रिलायन्स लाइफ इन्स्योरेन्स लिमिटेडले कर्णाली प्रदेशको कालिकोट जिल्लामा विपद् प्रभावित घरपरिवारलाई राहतस्वरूप कम्मल वितरण गरेको छ। संस्थागत सामाजिक उत्तरदायित्व अन्तर्गत कम्पनीले अविरल वर्षा र आगलागीबाट प्रभावित परिवारलाई सहयोग पुर्‍याएको हो।

कम्पनीका अनुसार २०८२ साल असोज १८ देखि २४ गतेसम्म परेको लगातार वर्षाका कारण क्षति पुगेका शुभ कालिका गाउँपालिका वडा नं. ७ र ८, महावै गाउँपालिका वडा नं. ५ र ६, खाँडाचक्र नगरपालिका वडा नं. १ र ५ तथा तिलागुफा नगरपालिका वडा नं. ७ र १० का घरपरिवारलाई राहत वितरण गरिएको हो। साथै, तिलागुफा नगरपालिका वडा नं. ५ र ६ तथा खाँडाचक्र नगरपालिका वडा नं. १० का आगलागी पीडितलाई समेत समेट्दै कुल ४३ घरपरिवारलाई कम्मल उपलब्ध गराइएको कम्पनीले जनाएको छ।

राहत वितरण कार्यक्रम कम्पनीको सुर्खेत शाखाका प्रमुख विश्वराज बोगटीको उपस्थितिमा सम्पन्न भएको थियो। कार्यक्रममा सहभागी पीडितहरूले प्राप्त सहयोगप्रति खुशी र सन्तुष्टि व्यक्त गर्दै दुर्गम क्षेत्रमा पुगेर सेवा दिएकोमा कम्पनीप्रति कृतज्ञता व्यक्त गरेका थिए।

कम्पनीले आगामी दिनहरूमा पनि सामाजिक उत्तरदायित्व अन्तर्गत शिक्षा, स्वास्थ्य, वातावरण संरक्षण, वित्तीय साक्षरता तथा विपद् व्यवस्थापनजस्ता क्षेत्रमा सक्रिय योगदान दिने प्रतिबद्धता जनाएको छ। नाफामुखी व्यापारसँगै सामाजिक हितलाई समान रूपमा अगाडि बढाउने लक्ष्य कम्पनीको रहेको छ।

सानिमा रिलायन्स लाइफ इन्स्योरेन्सले देशभर १६९ शाखा सञ्जालमार्फत सेवा प्रदान गर्दै आएको छ। कम्पनीको चुक्ता पूँजी ५ अर्ब रुपैयाँभन्दा बढी रहेको छ भने २० अर्ब रुपैयाँभन्दा बढी लगानी रहेको छ। साथै, २० हजारभन्दा बढी अभिकर्ता कम्पनीमा कार्यरत रहेका छन्।