निर्वाचन प्रणाली सुधारका लागि राजनीतिक दलसँग छलफल गर्दै आयोग

काठमाण्डौं   । निर्वाचन आयोगले निर्वाचनसम्बन्धी कानूनी संरचना सुधार तथा एकीकरणबारे आज राजनीतिक दलहरूसँग छलफल गर्ने भएको छ ।

आयोगले हाल कायम रहेका निर्वाचनसम्बन्धी सातवटा ऐनलाई एकीकृत गरी तयार पारिएको विधेयक मस्यौदामाथि दलहरूको सुझाव संकलन गर्ने उद्देश्यले छलफल आयोजना गरेको हो ।

कार्यवाहक प्रमुख निर्वाचन आयुक्त रामप्रसाद भण्डारीका अनुसार छलफल बिहान साढे ११ बजे शुरु हुने छ ।  

आयोगले दलहरूको सुझावका आधारमा मस्यौदालाई थप परिष्कृत बनाउने तयारी गरेको छ ।

उक्त मस्यौदा २०८० असार १८ गते सरकारसमक्ष पठाइएको भएपनि लामो समय गृह मन्त्रालयमा अड्किएर बसेको थियो । 

पछि संसद् विघटन भएपछि विधेयक पुनः आयोगमै फिर्ता आएको जनाइएको छ ।

यसअघि आयोगले यही वैशाख १५ गते राजनीतिक दलहरूलाई पत्राचार गर्दै मस्यौदामाथि राय–सुझाव उपलब्ध गराउन आग्रह गरेको थियो ।