अमेरिकाले आक्रमण गरे ९०% सम्म युरेनियम संवर्द्धन गर्ने इरानको चेतावनी

काठमाण्डौ । इरानका संसदीय राष्ट्रिय सुरक्षा तथा विदेश नीति आयोगका प्रवक्ता इब्राहिम रेजाईले इरानमाथि पुनः आक्रमण भए ९० प्रतिशत शुद्धतासम्म युरेनियम संवर्द्धन गर्ने विकल्पमाथि विचार हुन सक्ने बताएका छन्। उनले मंगलबार सामाजिक सञ्जाल एक्समार्फत यस्तो धारणा सार्वजनिक गरेका हुन्।

रेजाइका अनुसार सम्भावित आक्रमणको अवस्थामा ९० प्रतिशतसम्म युरेनियम संवर्द्धन गर्ने विषय संसदमा समीक्षा गर्न सकिनेछ। ९० प्रतिशत शुद्धताको युरेनियमलाई अन्तर्राष्ट्रिय रूपमा ‘हतियार(स्तर’ मानिन्छ।

यसअघि अमेरिकी राष्ट्रपति डोनाल्ड ट्रम्पले सोमबार अमेरिका र इरानबीच जारी युद्धविराम अत्यन्त कमजोर अवस्थामा रहेको बताएका थिए। उनले तेहरानको पछिल्लो प्रस्ताव अस्वीकार गरेपछि कूटनीतिक प्रयासहरू थप अनिश्चित बनेका छन्।

गत जुनमा ट्रम्पले अमेरिकी तथा इजरायली आक्रमणपछि इरानका आणविक केन्द्रहरू पूर्ण रूपमा ध्वस्त भएको दाबी गरेका थिए। यद्यपि, करिब ४०० किलोग्राम ६० प्रतिशतसम्म संवर्द्धित युरेनियमको अवस्थाबारे अझै स्पष्ट जानकारी सार्वजनिक भएको छैन।

अमेरिकी गुप्तचर मूल्यांकनअनुसार उक्त उच्च संवर्द्धित युरेनियम भण्डार नष्ट वा देशबाहिर नलगेसम्म इरानको आणविक कार्यक्रम पूर्ण रूपमा रोक्न कठिन हुने देखिएको छ।

अमेरिका र इरानबीच जारी वार्तामा आणविक मुद्दा प्रमुख विवादको विषय बनेको छ। तेहरानले आणविक विषयलाई पछिल्लो चरणमा छलफल गर्न चाहेको छ भने वासिङ्टनले उच्च संवर्द्धित युरेनियम विदेश पठाउन तथा स्वदेशमै संवर्द्धन नगर्ने प्रतिबद्धता मागिरहेको छ।