“लगानीकर्ता डराए, अर्थतन्त्र थलिएला”: सरकारलाई एफएनसीसीआईको चेतावनी

काठमाडौं । नेपाल उद्योग वाणिज्य महासंघ (एफएनसीसीआई) ले अनुसन्धानको नाममा उद्योगी, व्यवसायी र बैंकका उच्च अधिकारीमाथि भइरहेको पक्राउ तथा सार्वजनिक ‘मिडिया ट्रायल’ विरुद्ध कडा असन्तुष्टि जनाएको छ। महासंघले सरकारकै कार्यशैलीले निजी क्षेत्र आतंकित बनेको संकेत गर्दै यस्तो प्रवृत्ति नरोकिए अर्थतन्त्रमा गम्भीर असर पर्ने चेतावनी दिएको हो।

महासंघले बुधबार जारी गरेको विज्ञप्तिमा प्रारम्भिक अनुसन्धान नै पूरा नगरी व्यवसायीलाई पक्राउ गर्ने, सार्वजनिक रूपमा दोषीझैँ प्रस्तुत गर्ने तथा फौजदारी अभियुक्तसरह व्यवहार गर्ने कार्यले देशको लगानी वातावरण ध्वस्त बनाउने उल्लेख गरिएको छ। “यस्ता गतिविधिले लगानीकर्ता र व्यवसायिक समुदायमा त्रास सिर्जना गरेको छ,” महासंघले भनेको छ।

विशेषगरी बैंक तथा वित्तीय संस्थाका कार्यकारी अधिकारीमाथि भइरहेको कारबाहीप्रति महासंघ बढी आक्रोशित देखिएको छ। निक्षेपकर्ताको विश्वासमा टिकेको बैंकिङ प्रणालीमै असर पर्ने गरी भइरहेका कदमले कर्जा प्रवाह संकुचित हुने, लगानी घट्ने र अर्थतन्त्र थप संकटतर्फ धकेलिने चेतावनी महासंघले दिएको छ।

महासंघले सरकारमाथि अप्रत्यक्ष रूपमा शक्ति प्रदर्शन र ‘डरको राजनीति’ गरिरहेको आरोपसमेत लगाएको छ। अनुसन्धानलाई गोप्य र कानुनी प्रक्रियाभित्र सीमित राख्नुपर्नेमा सार्वजनिक प्रदर्शन र मिडिया ट्रायलमार्फत व्यवसायिक प्रतिष्ठामाथि आक्रमण भइरहेको महासंघको भनाइ छ। “कसुर प्रमाणित नहुँदै दोषीझैँ व्यवहार गर्नु संवैधानिक मूल्यविपरीत हो,” विज्ञप्तिमा उल्लेख छ।

चार वर्षदेखि थलिएको अर्थतन्त्र बल्ल विस्तारै चलायमान बन्न खोजिरहेका बेला सरकारकै गतिविधिले निजी क्षेत्र पुनः निरुत्साहित बनेको महासंघको निष्कर्ष छ। लगानीकर्ताले सुरक्षित महसुस गर्ने वातावरण बनाउन नसके आर्थिक पुनरुत्थानको सरकारी नारामात्रै खोक्रो सावित हुने संकेत महासंघले गरेको छ।