इजरायलमा २३ सय नेपाली केयरगिभर लैजाने तयारी

काठमाण्डौ। इजरायलले दीर्घकालीन स्याहार केन्द्रमा काम गर्ने नेपाली केयरगिभरको माग पुनः बढाएको छ । नेपाल–इजरायलबीचको सरकारी संयन्त्र (जिटुजी) श्रम सम्झौताअनुसार इजरायलले नेपालबाट थप २ हजार ३०० सहायक श्रमिक लैजाने प्रक्रिया अगाडि बढाएको हो ।

वैदेशिक रोजगार विभागका अनुसार इजरायलको जनसङ्ख्या तथा अध्यागमन प्राधिकरणबाट नयाँ कोटा प्राप्त भइसकेको छ भने तेस्रो चरणको श्रमिक छनोटका लागि सार्वजनिक सूचना जारी गर्ने अन्तिम तयारी भइरहेको छ । विभागले मन्त्रालयबाट आवश्यक निर्देशनसमेत प्राप्त गरिसकेको जनाएको छ ।

यसअघि पश्चिम एसियामा बढेको तनाव र नेपालमा सम्पन्न प्रतिनिधिसभा निर्वाचनका कारण भर्ती प्रक्रिया केही समय रोकिएको थियो । श्रम सम्झौताअनुसार मागपत्र प्राप्त भएको ४० दिनभित्र भर्ती प्रक्रिया सार्वजनिक गर्नुपर्ने व्यवस्था भए पनि विभिन्न परिस्थितिका कारण प्रक्रिया ढिलो भएको बताइएको छ ।

इजरायलमा नेपाली केयरगिभरको रोजगारी पछिल्लो समय आकर्षक वैदेशिक रोजगारीको रूपमा स्थापित हुँदै गएको छ । उच्च तलब, सुरक्षित कार्य वातावरण र कानुनी श्रम प्रणालीका कारण युवाहरूको आकर्षण बढ्दो छ ।

अघिल्लो चरणमा ३ हजार २६२ जना सूचीकृत भएकामध्ये लक्की ड्रमार्फत २ हजार ११२ जना छनोट भएका थिए । तीमध्ये १ हजार ९ जना इजरायल पुगिसकेका छन् । लक्की ड्रमा छनोट हुन नसकेका १ हजार १५४ जनालाई यसपटक पुनः सहभागी हुने अवसर दिइने विभागले जनाएको छ ।

इजरायल जान इच्छुक श्रमिकले अनिवार्य रूपमा अंग्रेजी भाषा परीक्षा उत्तीर्ण गर्नुपर्नेछ । साथै उमेर, तौल, स्वास्थ्य तथा प्राविधिक योग्यतासम्बन्धी मापदण्ड पनि कडाइका साथ लागू गरिने भएको छ ।

आवेदक २५ देखि ४५ वर्ष उमेर समूहको हुनुपर्नेछ भने कम्तीमा ४५ किलोग्राम तौल हुनुपर्ने प्रावधान छ । शैक्षिक रूपमा कम्तीमा एसईई उत्तीर्ण गरी अनमी वा सीएमएससम्बन्धी १५ महिने अध्ययन पूरा गरेको वा कक्षा १२ उत्तीर्ण गरी मान्यताप्राप्त संस्थाबाट तीन महिने केयरगिभिङ तालिम लिएको हुनुपर्ने व्यवस्था कायम छ ।