युद्धविराम भएको एक साता नपुग्दै लेबनानमा इजरायली हवाई आक्रमण, १९ जनाको मृत्यु

काठमाण्डौ । दक्षिणी लेबनानमा इजरायलले गरेको पछिल्लो हवाई आक्रमणमा कम्तीमा १९ जनाको मृत्यु भएको छ। लेबनानको स्वास्थ्य मन्त्रालयका अनुसार मृत्यु हुनेमध्ये १० जना एउटै आक्रमणमा परेका हुन्।

स्थानीय अधिकारीहरूका अनुसार देइर कनौन क्षेत्रमा रहेको एक आवासीय घरलाई लक्षित गरी गरिएको आक्रमणमा तीन बालबालिका र तीन महिलासहित धेरै सर्वसाधारणको ज्यान गएको छ। घटनापछि उद्धार टोलीले भग्नावशेषबाट घाइतेहरूको उद्धार कार्य जारी राखेको जनाएको छ।

लेबनान र इजरायलबीचको तनाव गत मार्च २ देखि थप चर्किएको हो। त्यसदिन इरान समर्थित शिया समूह हिजबुल्लाहले इजरायलतर्फ रकेट प्रहार गरेको थियो। उक्त आक्रमण अमेरिका र इजरायलको संयुक्त कारबाहीमा इरानका सर्वोच्च नेताको मृत्यु भएपछि गरिएको प्रतिक्रिया भएको बताइएको छ।

यसैबीच, अमेरिका नेतृत्वको मध्यस्थतामा इजरायल र लेबनानबीच ४५ दिनका लागि युद्धविराम विस्तार गर्ने सहमति भएको घोषणा भएको एक साताभन्दा कम समयमै पुनः हिंसा भड्किएको हो।

यद्यपि युद्धविराम कायम रहेको दाबी गरिए पनि दक्षिणी लेबनान क्षेत्रमा दुवै पक्षबीच गोलीबारी र हवाई आक्रमण जारी रहेका छन्।

इजरायलले आफ्ना कारबाही हिजबुल्लाहका संरचना र लडाकुहरूलाई लक्षित गरिएको दाबी गर्दै आएको छ। तर, लगातार भइरहेका आक्रमणमा सर्वसाधारण नागरिक, विशेषगरी महिला र बालबालिका प्रभावित भइरहेका छन्।