(2).gif)
.png)
काठमाण्डौं । राष्ट्रिय परीक्षा बोर्डले कक्षा–१२ को नतिजा प्रकाशनको तयारीलाई उच्च प्राथमिकताका साथ अघि बढाएको छ ।
बोर्ड अहिले उत्तरपुस्तिका परीक्षण, अंक प्रविष्टि र अन्तिम नतिजा प्रशोधनको कामलाई समानान्तर रूपमा सञ्चालन गर्दै असारको दोस्रो साताभित्र नतिजा सार्वजनिक गर्ने लक्ष्यमा केन्द्रित भएको हो ।
बोर्डका सहसचिव तथा प्रवक्ता जयन्ती सत्यालका अनुसार देशभरबाट आएका उत्तरपुस्तिकाको परीक्षण कार्य तीव्र गतिमा भइरहेको छ ।
“असार १० देखि १५ गतेभित्र नतिजा प्रकाशित गर्ने गरी काम अघि बढाइएको छ,” उनले भनिन्, “प्राविधिक र प्रशासनिक दुवै टोली पूर्ण रूपमा परिचालित छन् ।”
यसपटक सरकारले परीक्षा सकिएको ४५ दिनभित्रै नतिजा सार्वजनिक गर्न निर्देशन दिएको छ ।
सोहीअनुसार बोर्डले विगतका वर्षमा देखिने ढिलाइ कम गर्दै नतिजा छिटो सार्वजनिक गर्ने तयारी गरेको हो ।
अघिल्ला वर्षहरूमा कक्षा–१२ को नतिजा सार्वजनिक हुन झण्डै तीन महिना लाग्ने गरेको थियो ।
वैशाखमा परीक्षा सकिएपछि विद्यार्थीहरूले साउनसम्म कुर्नुपर्ने अवस्था रहन्थ्यो ।
तर, यस वर्ष बोर्डले प्रक्रियागत सुधार गर्दै परीक्षण र प्राविधिक कामलाई एकसाथ अघि बढाएकाले नतिजा अपेक्षाभन्दा चाँडै आउने सम्भावना बढेको छ ।
यस वर्षको कक्षा–१२ परीक्षा वैशाख १४ गतेदेखि २७ गतेसम्म सञ्चालन गरिएको थियो ।
परीक्षा बिहान ८ बजेदेखि ११ बजेसम्म सञ्चालन भएको थियो ।
यसअघि राष्ट्रिय परीक्षा बोर्ड ले एसईईको नतिजा पनि समयसीमाभित्रै सार्वजनिक गरेको थियो ।
वैशाख २८ गते सार्वजनिक भएको एसईई नतिजामा ६५.९८ प्रतिशत विद्यार्थी उत्तीर्ण भएका थिए, जुन अघिल्लो वर्षको तुलनामा सुधारिएको परिणाम हो ।
शिक्षा मन्त्रालय ले असार १ गतेदेखि कक्षा–११ को भर्ना तथा पठनपाठन शुरु गर्ने निर्णय गरिसकेको अवस्थामा कक्षा–१२ को नतिजा पनि समयमै सार्वजनिक गर्न बोर्डमाथि थप दबाब परेको देखिन्छ ।
गतवर्ष कक्षा–१२ परीक्षामा नियमिततर्फ ३ लाख ९६ हजार ३४७ तथा आंशिकतर्फ १ लाख १४ हजार ६४० विद्यार्थी सहभागी भएका थिए ।
यसवर्ष पनि ठूलो संख्यामा विद्यार्थी सहभागी भएकाले नतिजाप्रति विद्यार्थी, अभिभावक र शैक्षिक संस्थाहरूको चासो उच्च रहेको छ ।
शिक्षा क्षेत्रका जानकारहरूका अनुसार नतिजा छिटो सार्वजनिक हुँदा विश्वविद्यालय भर्ना प्रक्रिया, विदेश अध्ययन तयारी र नयाँ शैक्षिक सत्र व्यवस्थापन सहज हुने अपेक्षा गरिएको छ ।
.png)
.jpg)
