२६.२०% जनसंख्या सेयरबजारमा आबद्ध, टीएमएस लिनेको संख्या २४.८२% ले वृद्धि

काठमाण्डौ । नेपालको कुल जनसंख्याको करिब २६.२ प्रतिशत जनसंख्या सेयरबजारमा आबद्ध भएका छन् । अर्थमन्त्री डा. स्वर्णिम वाग्लेले संसदमा पेश गरेको आव २०८२/८३ को आर्थिक सर्वेक्षणमा २०८२ को फागुन मसान्तसम्म डिम्याट खाता खोल्नेको संख्या ७६ लाख ३९ हजार पुगेको छ ।  

सरकारको आर्थिक सर्वेक्षणअनुसार धितोपत्रको दोस्रो बजारमा कारोबार गर्ने लगानीकर्ताको संख्या उल्लेख्य बढेको छ । चालु आवको फागुन मसान्तसम्म दोस्रो बजारमा अनलाइन कारोबारका लागि लग–इन (टीएमएस) लिने लगानीकर्ताको संख्या ३१ लाख ८२ हकजार ४६२ पुगेको छ । गत आवको सोही अवधिसम्म यस्तो संख्या २५ लाख ४९ हजार ६९६ रहेको थियो ।  

यसर्थमा एक वर्षको अवधिमा दोस्रो बजारमा लगानीकर्ताको संख्या २४.८२ प्रतिशतले बढेको छ ।    

२०८२ को असार मसान्तसम्म भने डिम्याट खाता खोल्नेको संख्या ६९ लाख ९७ हजार रहेको आर्थिक सर्वेक्षणमा उल्लेख छ ।  

साथै २०८२ असारसम्म मेरो सेयरको खाताको संख्या ५९ लाख ७६ हजार रहेकोमा २०८२ फागुन मसान्तसम्म ६६ लाख १३ हजार पुगेको छ । यो संख्या कुल जनसंख्याको करिब २२.७ प्रतिशत हो ।  

त्यस्तै, चालु आवको फागुन मसान्तसम्म सिडिएस एण्ड क्लियरिङ लिमिटेडमा अभौतिकृत धितोपत्रको संख्या गत आवको सोही अवधिसम्मको तुलनामा २३.६ प्रतिशतले वृद्धि भई १५ अर्ब ९० करोड ५५ लाख रुपैयाँ पु्गेको छ ।  

यस अवधिमा धितोपत्र अभौतिकृत गर्ने कम्पनीको संख्या २७३ पुगेको छ भने निक्षेप सेवा प्रदान गर्न चालु आवको फागुनसम्म सिडिएससीको सदस्यता प्राप्त गर्ने निक्षेप सदस्यको संख्या १२२ पुगेको छ ।