मुकेश अम्बानी एशियाली धनाढ्यको सूचीको तेस्रो स्थानमा झरे, चिनियाँ अरबपतिले उछिने

काठमाण्डौ । भारतीय धनाढ्य तथा रिलायन्स इन्डस्ट्रिजका अध्यक्ष मुकेश अम्बानीको सम्पत्तिमा गिरावट आएको छ । भारतीय सेयर बजारमा लगातार चार दिनको गिरावटपछि सुधार देखिए पनि रिलायन्स इन्डस्ट्रिजको सेयरमा आएको गिरावटका कारण अम्बानीको सम्पत्ति घटेको हो । यससँगै उनी एशियामा दोस्रोबाट तेस्रो स्थानमा खस्किएका छन्।

ब्लुमबर्ग बिलिनेयर इन्डेक्सका अनुसार, अम्बानीको सम्पत्ति करिब ४९ करोड अमेरिकी डलरले घट्दै अब ८६.९ अर्ब डलरमा झरेको छ। यस गिरावटसँगै उनी विश्वका अर्बपतिहरूको सूचीमा चार स्थान तल झर्दै २५औँ स्थानमा पुगेका छन्।

यस वर्ष मात्र अम्बानीको कुल सम्पत्तिमा करिब २०.८ अर्ब डलरको गिरावट देखिएको छ।

चीनको बाइटडान्स कम्पनीका सह–संस्थापक झाङ यिमिङले सम्पत्तिमा ठूलो वृद्धि गर्दै अम्बानीलाई पछि पारेका हुन्। बाइटडान्सले लोकप्रिय सामाजिक सञ्जाल प्लेटफर्म टिकटक सञ्चालन गर्दछ।

हाल झाङ यिमिङको कुल सम्पत्ति करिब ९२.८ अर्ब डलर पुगेको छ, जसले उनलाई एशियामा दोस्रो स्थानमा पुर्याएको छ।

एशियाली धनाढ्यको सूचीमा भारतीय उद्योगपति गौतम अडानी एशियाका शीर्ष स्थानमा कायम छन्। उनको सम्पत्ति करिब ११७ अर्ब डलर पुगेको छ र उनी विश्व सूचीमा १७औँ स्थानमा छन्।

विश्वको शीर्ष स्थानमा टेस्लाका एलन मस्क करिब ७२६ अर्ब डलर सम्पत्तिसहित अग्रस्थानमा रहेका छन्। त्यसपछि ल्यारी पेज, ल्यारी एलिसन, सर्गेई ब्रिन र जेफ बेजोस लगायतका प्रविधि तथा व्यापार क्षेत्रका दिग्गजहरू शीर्ष १० सूचीमा परेका छन्।