ब्राजिलद्वारा अमेरिकी प्रतिनिधिमण्डललाई भिसा दिन अस्वीकार

काठमाण्डौ । आगामी अक्टोबर ४ मा हुने राष्ट्रपतीय निर्वाचनअघि ब्राजिलले अमेरिकी विदेश मन्त्रालयका दुई वरिष्ठ अधिकारीलाई भिसा दिन अस्वीकार गरेको छ। निर्वाचनको निष्पक्षता र विश्वसनीयतामाथि प्रश्न उठाउने उद्देश्यले उनीहरू ब्राजिल भ्रमणमा आउन लागेको आशंकापछि यस्तो निर्णय गरिएको ब्राजिलको विदेश मन्त्रालयले जनाएको छ।

अमेरिकी विदेश मन्त्रालयका एक वरिष्ठ अधिकारी तथा ब्राजिलका तीन सरकारी अधिकारीका अनुसार सहायक विदेश सचिव राइली एम। बार्न्स र उपसहायक विदेश सचिव सामुएल स्यामसन सहभागी प्रतिनिधिमण्डल केही दिनभित्र ब्रासिलिया पुग्ने तयारीमा थियो। उनीहरूले ब्राजिलको निर्वाचन प्रक्रियासँग सम्बन्धित व्यक्तिहरूसँग भेटघाट गर्ने उद्देश्यले वासिङ्टनस्थित ब्राजिलियन वाणिज्य दूतावासमार्फत भिसाका लागि आवेदन दिएका थिए।

तर भ्रमणको उद्देश्य सार्वजनिक भएपछि ब्राजिल सरकारले उनीहरूको यात्रा स्वीकृति नदिएको जनाएको छ। अमेरिकी प्रतिनिधिमण्डलले कसलाई भेट्ने वा निर्वाचन प्रणालीको विश्वसनीयता कसरी मूल्यांकन गर्ने योजना बनाएको थियो भन्ने विषय भने खुलाइएको छैन।

ब्राजिलको विद्युतीय मतदान प्रणाली दक्षिण अमेरिकामै विश्वसनीय मानिने प्रणालीमध्ये एक हो। मतदान सम्पन्न भएको केही घण्टामै नतिजा सार्वजनिक गर्ने क्षमताका कारण यसलाई प्रभावकारी निर्वाचन प्रणालीका रूपमा लिइन्छ।

यसैबीच, ब्राजिलको लिबरल पार्टीले पूर्वराष्ट्रपति जाइर बोल्सोनारोका जेठा छोरा तथा सिनेटर फ्लाभियो बोल्सोनारोलाई औपचारिक रूपमा राष्ट्रपतिको उम्मेदवार घोषणा गरेको छ।

साओ पाउलोमा आयोजित पार्टी अधिवेशनलाई सम्बोधन गर्दै ४५ वर्षीय फ्लाभियोले आफ्नो उम्मेदवारीलाई पिताको राजनीतिक अभियानको निरन्तरताका रूपमा प्रस्तुत गरे। उनले वर्तमान राष्ट्रपति लुइज इनासियो लुला दा सिल्भा नेतृत्वको सरकारमाथि भ्रष्टाचारलाई प्रश्रय दिएको, करको भार बढाएको, राजनीतिक प्रतिद्वन्द्वीमाथि दबाब सिर्जना गरेको तथा नागरिक स्वतन्त्रता संकुचित गरेको आरोप लगाए।

फ्लाभियोले आफ्ना पिता राजनीतिक रूपमा लक्षित कारबाहीको शिकार बनेको दाबी गर्दै सर्वोच्च संघीय अदालत र न्यायाधीश अलेक्जान्द्रे डे मोराइसको समेत आलोचना गरे।

उनले चुनावी एजेन्डाअन्तर्गत कर कटौती, संसदमा बलियो केन्द्र(दक्षिणपन्थी गठबन्धन निर्माण, गम्भीर अपराधमा कडा सजाय, जघन्य अपराधमा संलग्न किशोरमाथि कडा कानुनी व्यवस्था, लैङ्गिक हिंसाविरुद्ध कठोर दण्ड तथा बालबलात्कारका दोषीलाई रासायनिक बन्ध्याकरणको व्यवस्था गर्ने प्रतिबद्धता व्यक्त गरेका छन्।

ब्राजिलमा आगामी अक्टोबर ४ मा हुने राष्ट्रपतीय निर्वाचनअघि राजनीतिक ध्रुवीकरण र अन्तर्राष्ट्रिय चासो दुवै बढ्दै गएको देखिएको छ।