रवि लामिछानेले बोलाए सर्वदलीय बैठक, देवानगञ्ज घटनाबारे छलफल हुने

काठमाण्डौ । सुनसरीको देवानगञ्जमा भएको घटनापछि उत्पन्न परिस्थिति, सामाजिक सद्भाव र शान्ति सुरक्षाका विषयमा साझा धारणा बनाउन राष्ट्रिय स्वतन्त्र पार्टी (रास्वपा)को पहलमा बुधबार सर्वदलीय बैठक बस्दै छ।

रास्वपाका सभापति रवि लामिछानेको आह्वानमा बिहान ८ बजे सिंहदरबारस्थित सार्वजनिक लेखा समितिको बैठक कक्षमा बैठक तय गरिएको हो। बैठकमा संघीय संसदमा प्रतिनिधित्व गर्ने सबै राजनीतिक दलका साथै जनता समाजवादी पार्टी, लोकतान्त्रिक समाजवादी पार्टी र जनमत पार्टीका शीर्ष नेतृत्वलाई पनि आमन्त्रण गरिएको रास्वपाले जनाएको छ।

सभापति लामिछानेले सम्बन्धित दलका नेताहरूलाई औपचारिक पत्राचार गर्नुका साथै व्यक्तिगत रूपमा टेलिफोन सम्पर्क गरेर बैठकमा सहभागी हुन आग्रह गरेका छन्।

देवानगञ्जको संवेदनशील र दुःखद घटनापछि सामाजिक सद्भाव कायम राख्ने, शान्ति–सुरक्षा सुदृढ बनाउने तथा द्वेषपूर्ण गतिविधि न्यूनीकरणका लागि राजनीतिक दलहरूले संयुक्त सन्देश दिन आवश्यक ठानिएकाले सर्वदलीय छलफलको आयोजना हुन लागेका जनाइएको छ ।