(2).gif)
.jpg)
.png)
काठमाण्डौ । नेपाल राष्ट्र बैंकले बैंकिङ नियमन तथा निर्देशनहरूको उल्लंघन गरेको भन्दै तीन वाणिज्य बैंकलाई कारबाही गरेको छ । केन्द्रीय बैंकको बैंक सुपरिवेक्षण विभागले गरेको पछिल्लो अनुगमनका क्रममा गम्भीर कमजोरीहरू भेटिएपछि प्रभु बैंक, राष्ट्रिय वाणिज्य बैंक र कृषि विकास बैंक कारबाहीमा परेका हुन् ।
प्रभु बैंकलाई आर्थिक जरिवानासहित सुधारात्मक निर्देशन दिइएको छ भने सरकारी स्वामित्वका राष्ट्रिय वाणिज्य बैंक र कृषि विकास बैंकलाई भने सचेत गराइएको छ ।
निरीक्षणका क्रममा राष्ट्रिय वाणिज्य बैंक र कृषि विकास बैंकले खाता रोक्का सम्बन्धी कानुनी व्यवस्था प्रभावकारी रूपमा कार्यान्वयन नगरेको पाइएको राष्ट्र बैंकले जनाएको छ ।
राष्ट्रिय वाणिज्य बैंकले बैंक खाता रोक्का तथा फुकुवासम्बन्धी विनियमावली, २०८१ को व्यवस्था विपरीत समयमै खाता रोक्का नगरेको भन्दै पहिलो पटक सचेत गराइएको छ ।
त्यस्तै, कृषि विकास बैंकले पनि कानुन कार्यान्वयन गर्ने निकायहरूको अनुरोधअनुसार खाता रोक्का गर्न ढिलाइ गरेको भेटिएपछि आगामी दिनमा यस्ता कमजोरी नदोहोरÞ्याउन निर्देशन दिइएको छ ।
त्यस्तै, राष्ट्र बैंकका अनुसार प्रभु बैंकले कर्जा वर्गीकरणमा गम्भीर लापरबाही गरेको, पर्याप्त कर्जा नोक्सानी व्यवस्था कायम नगरेको तथा केन्द्रीय बैंकलाई गलत विवरण बुझाएको पुष्टि भएको छ ।
अनुगमनका क्रममा कोर बैंकिङ सिस्टमको विवरण र राष्ट्र बैंकमा पेश गरिएको प्रतिवेदनबीच फरक भेटिएपछि तत्कालीन प्रमुख कार्यकारी अधिकृत (सीईओ) अशोक शेरचनलाई ५ लाख रुपैयाँ जरिवाना गरिएको हो ।
राष्ट्र बैंकले पटक–पटक निर्देशन दिँदा पनि सुधार नभएको निष्कर्ष निकाल्दै बैंकको सञ्चालक समितिसँग कबोलियतनामा गराई सुधारात्मक कार्ययोजना कार्यान्वयन गर्न निर्देशन दिएको जनाएको छ ।
.png)
