विश्वकै तेस्रो सानो देशले परिवर्तन गर्यो आफ्नो नाम

काठमाण्डौ । प्रशान्त महासागरको सानो द्वीप राष्ट्र नाउरुले आधिकारिक रूपमा आफ्नो नाम परिवर्तन गर्दै अब ‘रिपब्लिक अफ नाओएरो’ कायम गरेको छ। देशको सरकारले यो निर्णय आफ्नो परम्परागत नाम, भाषा, सांस्कृतिक सम्पदा र राष्ट्रिय पहिचानलाई सम्मान गर्ने उद्देश्यले गरिएको जनाएको छ।

राष्ट्रपति डेभिड एडेङले नाम परिवर्तनले देशको इतिहास, मौलिक भाषा र पहिचानलाई अझ मजबुत बनाउने बताएका छन्। नाम परिवर्तनसम्बन्धी संवैधानिक संशोधन संसदबाट दुई पटक पारित भएको थियो।

सरकारका अनुसार ‘नाउरु’ नाम विदेशीहरूलाई उच्चारण गर्न सजिलो हुने भएकाले प्रचलनमा आएको थियो, जबकि ‘नाओएरो’ देशको परम्परागत नाम हो। नयाँ नाम लागू भएपछि देशको अन्तर्राष्ट्रिय कोड एनआरयुबाट एनआरओमा परिवर्तन गरिनेछ भने नागरिकलाई अब ‘देई–नाओएरो’ भनेर सम्बोधन गरिनेछ।

सरकारले यस विषयमा जनमत संग्रह नगर्ने निर्णय गरेको छ। ‘नाओएरो’ नाम पहिलेदेखि नै राष्ट्रिय प्रतीक र संविधानमा प्रयोग हुँदै आएको तथा स्थानीय समुदायमा प्रचलित रहेको भन्दै जनमत संग्रह आवश्यक नभएको बताइएको छ।

संयुक्त राष्ट्रसंघसहित विभिन्न अन्तर्राष्ट्रिय निकायहरूले नयाँ नाम प्रयोग गर्न थालेका छन्। अष्ट्रेलिया, न्युजिल्यान्ड तथा अन्य देशका कूटनीतिक निकायहरूले पनि ‘नाओएरो’ नामलाई अपनाउन थालेका छन्।

करिब १२ हजार जनसंख्या रहेको नाओएरो विश्वको जनसंख्याका आधारमा तेस्रो सबैभन्दा सानो देश हो। सन् १९६८ मा स्वतन्त्रता प्राप्त गरेको यो राष्ट्र विगतमा जर्मनी र अष्ट्रेलियाको औपनिवेशिक शासनअन्तर्गत थियो। अहिले यो देश समुद्री सतह बढ्ने जलवायु परिवर्तनको प्रभावबाट अत्यधिक प्रभावित राष्ट्रहरूमध्ये एक मानिन्छ।