बाबा भंगाका नाममा जोडिएका २०२६ का भविष्यवाणी फेरि चर्चामा, तीनवटा डरलाग्दा दाबी अझै बाँकी

काठमाण्डौ । सन् २०२६ सकिन अब पाँच महिना मात्र बाँकी रहँदा बुल्गेरियाकी चर्चित भविष्यवक्ता बाबा भंगाका नाममा जोडिएका यस वर्षका कथित भविष्यवाणीहरू फेरि चर्चामा आएका छन्। उनका समर्थकहरूले २०२६ का पाँच प्रमुख भविष्यवाणीमध्ये दुईवटा घटनासँग मेल खाइसकेको र बाँकी तीनवटा भयावह दाबी अझै पूरा हुन बाँकी रहेको बताइरहेका छन्।

सन् १९९६ मा निधन भएकी बाबा भंगालाई प्राकृतिक विपत्ति, प्रविधिको विस्तार तथा विश्व राजनीतिसँग सम्बन्धित विभिन्न घटनाको भविष्यवाणी गरेको दाबी गरिन्छ। तर उनका नाममा प्रचलित धेरैजसो भविष्यवाणीको कुनै प्रमाणित लिखित अभिलेख उपलब्ध छैन।

बाबा भंगाका समर्थकहरूले सन् २०२६ का लागि विश्वका विभिन्न क्षेत्रमा ठूलो स्तरका प्राकृतिक विपत्ति आउने भविष्यवाणी गरिएको दाबी गरेका छन्। उनीहरूले भूकम्प, तातो हावाको लहर, डढेलो, बाढी तथा शक्तिशाली आँधीलाई उक्त भविष्यवाणीसँग जोड्ने गरेका छन्।

तर यस्तो दाबीमा स्पष्ट समय, स्थान वा घटनाको विवरण नभएकाले कुनै पनि प्राकृतिक विपत्तिलाई उक्त भविष्यवाणीसँग जोड्न सकिने अवस्था देखिन्छ। भूकम्प, बाढी, डढेलो र आँधी हरेक वर्ष विश्वका विभिन्न क्षेत्रमा हुने भएकाले यस्ता अस्पष्ट भविष्यवाणीलाई पछि भएका घटनासँग मिलाउन सजिलो हुन्छ।

त्यस्तै, अर्को दाबी कृत्रिम बुद्धिमत्ता (एआई) ले ठूलो संख्यामा मानव श्रमिकलाई विस्थापित गर्ने विषयसँग सम्बन्धित छ। यद्यपि एआईको विकास दशकौँदेखि हुँदै आएको छ। बाबा भंगाले यस्तो भविष्यवाणी कहिले र कुन सन्दर्भमा गरेकी थिइन् भन्ने पुष्टि गर्ने विश्वसनीय अभिलेख पनि उपलब्ध छैन।

बाबा भंगाका नाममा जोडिएको सबैभन्दा असाधारण दाबी भने पृथ्वीबाह्य जीव अर्थात् एलियनसँग मानवको सम्भावित सम्पर्कबारे छ।

उक्त दाबीअनुसार नोभेम्बरमा एउटा ‘विशाल अन्तरिक्षयान’ पृथ्वीको वायुमण्डलमा प्रवेश गर्ने र त्यसपछि मानवजातिको एलियनसँग सम्पर्क हुने बताइएको छ।

अज्ञात उड्ने वस्तु अर्थात् यूएफओ तथा ‘अनआइडेन्टिफाइड एनोमलस फेनोमेना’ (यूएपी) सम्बन्धी अमेरिकी सरकारी सामग्री सार्वजनिक भइरहेका बेला यस्ता दाबीप्रति चासो पनि बढेको छ।

तर आकाशमा देखिएका वा पहिचान हुन नसकेका वस्तुहरूलाई एलियनको अन्तरिक्षयान भएको प्रमाणका रूपमा लिन सकिँदैन। त्यस्ता वस्तु पछि ड्रोन, विमान, बेलुन, स्याटेलाइट, वायुमण्डलीय घटना वा सेन्सरको त्रुटि हुन सक्ने सम्भावना पनि हुन्छ।

तेस्रो विश्वयुद्धको दाबी

२०२६ का लागि बाबा भंगाको नाममा जोडिएको अर्को दाबी तेस्रो विश्वयुद्ध सुरु हुने विषयसँग सम्बन्धित छ।

यस दाबीका विभिन्न व्याख्यामा चीनले ताइवानमाथि नियन्त्रण कायम गर्ने प्रयास गर्ने र रूस तथा अमेरिकाबीचको तनाव प्रत्यक्ष सैन्य द्वन्द्वमा परिणत हुने उल्लेख गरिएको पाइन्छ।

अगस्ट ७ सम्म त्यस्तो अवस्था उत्पन्न भएको छैन। ताइवान हाल आफ्नै सरकारअन्तर्गत सञ्चालनमा छ भने रूस र अमेरिका प्रत्यक्ष युद्धमा प्रवेश गरेका छैनन्। यद्यपि युक्रेन युद्ध तथा विश्वका प्रमुख शक्तिबीच बढ्दो भूराजनीतिक तनावका कारण तेस्रो विश्वयुद्धसम्बन्धी अड्कलबाजी भने निरन्तर चर्चामा छ।

पुटिन सत्ताबाट बाहिरिने दाबी

बाबा भंगासँग जोडिएको अर्को दाबी रूसका राष्ट्रपति भ्लादिमिर पुटिनको राजनीतिक भविष्यसँग सम्बन्धित छ। समर्थकहरूका अनुसार पुटिन सन् २०२६ को अन्त्यअघि सत्ताबाट बाहिरिने र उनको स्थानमा नयाँ नेता आउनेछन्।

पुटिन लामो समयदेखि रूसको राजनीतिमा प्रभावशाली भूमिकामा छन्। हालसम्म उनी सत्ताबाट हट्ने तयारीमा रहेको कुनै सार्वजनिक प्रमाण भने देखिएको छैन।

उनको स्वास्थ्य र राजनीतिक भविष्यबारे विगतमा विभिन्न अड्कलबाजी हुँदै आए पनि त्यस्ता चर्चाले अहिलेसम्म उनको सत्ताबाट बहिर्गमनको रूप लिएका छैनन्।

बाबा भंगाले के भविष्यवाणी गरेकी थिइन् ?

बाबा भंगाको वास्तविक नाम वान्गेलिया पान्देवा दिमित्रोभा थियो। सन् १९११ मा जन्मिएकी उनी दृष्टिविहीन बुल्गेरियन रहस्यवादी, भविष्यवक्ता तथा जडीबुटी विशेषज्ञका रूपमा चर्चित थिइन्। जीवनसम्बन्धी विभिन्न विवरणअनुसार १२ वर्षको उमेरमा आँधीबेहरीमा परेपछि उनको दृष्टि गुमेको बताइन्छ।

उनका समर्थकहरूले सेप्टेम्बर ११ को आतंकवादी हमला, चेर्नोबिल दुर्घटना, राजकुमारी डायनाको मृत्यु, सन् २००४ को हिन्द महासागर सुनामी, ब्रेक्जिट तथा आईएसआईएसको उदयजस्ता घटनाको पूर्वानुमान उनले गरेको दाबी गर्दै आएका छन्।

उनका करिब ८५ प्रतिशत भविष्यवाणी सही साबित भएको दाबीसमेत गरिन्छ। तर यो तथ्य स्वतन्त्र रूपमा प्रमाणित भएको छैन।