युक्रेनी आक्रमणपछि रुसमा पेट्रोल अभाव, भारतबाट गर्न थाल्यो आयात

काठमाण्डौ । युक्रेनले रुसी तेल प्रशोधन केन्द्रहरूलाई लक्षित गरी लगातार आक्रमण गरेपछि रुसमा पेट्रोलको आपूर्ति प्रभावित भएको छ। घरेलु बजारमा देखिएको इन्धन अभाव पूर्ति गर्न रुसले भारतबाट पेट्रोल आयात गर्न थालेको ब्लुमबर्गले जनाएको छ।

रिपोर्टअनुसार भारतबाट आएको पहिलो पेट्रोलको खेप अगस्ट ५ मा रुस पुगेको थियो। उक्त इन्धन भारतको नायरा इनर्जीले आपूर्ति गरेको हो। नायरा इनर्जीमा रुसी सरकारी तेल कम्पनी रोसनेफ्टको महत्वपूर्ण हिस्सेदारी रहेको छ।

भारतबाट रुसतर्फ पठाइएको पेट्रोलको आपूर्ति मार्ग भने प्रत्यक्ष थिएन। रुसी सम्बन्ध भएका ट्याङ्करमार्फत भारतको गुजरातस्थित वाडिनार रिफाइनरीबाट इन्धन ढुवानी गरी इजिप्टको डामिएट्टा बन्दरगाहनजिक अर्को जहाजमा सारिएको र त्यसपछि रुस पुर्याइएको बताइएको छ।

ब्लुमबर्गका अनुसार एउटा रुसी ट्याङ्करले जुन १८ मा वाडिनारबाट करिब ४२ हजार मेट्रिक टन पेट्रोल लोड गरेको थियो। इन्धनलाई डामिएट्टामा अर्को जहाजमा स्थानान्तरण गरेपछि रुसतर्फ पठाइएको थियो। ऊर्जा बजारसम्बन्धी कम्पनी केप्लरले यस्तै प्रकृतिका थप केही ढुवानीसमेत अभिलेख गरेको जनाएको छ।

यसबीच, रुसी रिफाइनरीहरूको उत्पादनमा उल्लेख्य गिरावट आएको छ। इए एनालिटिक्सका अनुसार जुलाईमा रुसी रिफाइनरीहरूले दैनिक करिब ३६ लाख ब्यारेल कच्चा तेल प्रशोधन गरेका थिए, जुन मौसमी औसतभन्दा करिब एकतिहाइ कम हो।

पछिल्लो समय युक्रेनी आक्रमणमा पाँचवटा रुसी तेल प्रशोधन केन्द्र प्रभावित भएको र त्यसपछि थप कम्तीमा दुई रिफाइनरीमा आक्रमण भएको रिपोर्टमा उल्लेख छ। उत्पादन र घरेलु आपूर्तिमा आएको दबाबका कारण मस्कोले आफ्नै बजारमा इन्धन उपलब्धता सुनिश्चित गर्न पेट्रोल तथा डिजेलको निर्यातमा प्रतिबन्ध लगाएको छ।

भारतबाट भइरहेको आयात, बेलारुस तथा अन्य छिमेकी मुलुकबाट जारी आपूर्तिसँगै हेर्दा रुसी पेट्रोल बजारमा आपूर्ति र मागबीच गम्भीर असन्तुलन देखिएको संकेत गरेको जनाइएको छ।

यसैबीच, युक्रेनतर्फ पनि रुसी आक्रमणका कारण क्षति र मानवीय हताहतीका घटना जारी छन्। खेरसन क्षेत्रमा रुसी गोलाबारीबाट एक जनाको मृत्यु र दुई जना घाइते भएको युक्रेनी अधिकारीहरूले बताएका छन्। डिनिप्रोमा विश्व स्वास्थ्य संगठनको मानवीय सहायता गोदाम पनि रुसी आक्रमणमा ध्वस्त भएको जनाइएको छ।