नाइमाको ५० लाख घोषणापछि दबाबमा नाडा, अन्तिम तीन घण्टाको टिकट रकम बाढीपीडितलाई दिने

काठमाडौं। स्थापनाको दुई वर्षसमेत पूरा नगरेको नेपाल अटोमोबाइल इम्पोर्टर्स एण्ड म्यानुफ्याक्चरर्स एसोसिएसन (नाइमा)ले भोटेकोशी बाढीपीडितका लागि ५० लाख रुपैयाँ सहयोग घोषणा गरेपछि नैतिक दबाबमा परेको नाडा अटोमोबाइल्स एसोसिएसन अफ नेपालले थप सहायता योजना सार्वजनिक गरेको छ।

नाडाले आइतबार नाडा अटो शोको अन्तिम दिन साँझ ४ बजेदेखि ७ बजेसम्म बिक्री हुने सम्पूर्ण टिकटबाट उठेको रकम बाढी तथा पहिरोपीडितलाई उपलब्ध गराउने घोषणा गरेको हो।

यसअघि नेपालको अटोमोबाइल क्षेत्रको पाँच दशक पुरानो संस्था नाडाले बाढीपीडितका लागि १० लाख रुपैयाँ सहयोग घोषणा गरेको थियो। तर, नाडाबाट अलग भएका व्यवसायीको सक्रियतामा स्थापित कान्छो संस्था नाइमाले त्यसको पाँच गुणा अर्थात् ५० लाख रुपैयाँ प्रधानमन्त्री दैवी प्रकोप उद्धार कोषमा जम्मा गर्ने निर्णय सार्वजनिक गरेपछि नाडाको योगदानको आकारमाथि प्रश्न उठेको थियो।

स्वर्ण वर्षको उत्सवसहित देशकै ठूलो अटोमोबाइल प्रदर्शनी सञ्चालन गरिरहेको नाडाले विपत्तिमा जम्मा १० लाख रुपैयाँ सहयोग गरेको भन्दै आलोचना र नैतिक दबाब बढिरहेकै बेला अटो शोको अन्तिम तीन घण्टाको टिकट रकम पीडितलाई दिने नयाँ घोषणा आएको हो।

यद्यपि, नाडाको पछिल्लो घोषणाबाट कति रकम संकलन हुन्छ भन्ने निश्चित छैन। त्यो साँझ ४ देखि ७ बजेसम्म आउने अवलोकनकर्ताको संख्या र बिक्री हुने टिकटमा निर्भर रहनेछ। नाइमाले निश्चित रूपमा ५० लाख रुपैयाँ दिने निर्णय गरेको छ भने नाडाको थप सहयोगको वास्तविक आकार अटो शो समाप्त भएपछि मात्रै स्पष्ट हुनेछ।

नाडाले सामाजिक उत्तरदायित्व तथा विपद्मा परेका नागरिकप्रति ऐक्यबद्धता जनाउँदै मेलाको अन्तिम समयलाई राहत कोषमा योगदान गर्ने अवसरका रूपमा उपयोग गर्ने निर्णय गरिएको जनाएको छ।

“एकातर्फ हामी सवारीसाधन र प्रविधिको उत्सव मनाइरहेका छौँ भने अर्कोतर्फ देशभर हाम्रा दाजुभाइ तथा दिदीबहिनीहरू प्राकृतिक विपत्तिको सामना गरिरहनुभएको छ,” नाडाका प्रतिनिधिले भनेका छन्, “अन्तिम तीन घण्टामा संकलन हुने टिकट शुल्क सोझै पीडितहरूसम्म पुर्‍याउने उद्देश्य राखेका छौँ। यो समयमा आउनुहुने प्रत्येक अवलोकनकर्ताको उपस्थिति राहत कार्यमा प्रत्यक्ष योगदान बन्नेछ।”

नाडाले काठमाडौंको भृकुटीमण्डपमा जारी अटो शोमा सहभागी भएर परोपकारी अभियान सफल बनाउन सर्वसाधारणलाई आग्रह गरेको छ। संकलित सम्पूर्ण रकम निष्पक्ष र पारदर्शी ढंगले आधिकारिक राहत कोषमार्फत प्रभावित क्षेत्रका पीडितसम्म पुर्‍याइने उसको भनाइ छ।

नाडाको पछिल्लो कदम सकारात्मक भए पनि यसले एउटा प्रश्न भने कायमै राखेको छ-अन्तिम तीन घण्टाको टिकट आम्दानी हस्तान्तरण गरेर मात्र पाँच दशक पुरानो तथा ठूलो व्यावसायिक सञ्जाल भएको संस्थाको दायित्व पूरा हुन्छ, वा नाइमाले जस्तै निश्चित र उल्लेख्य थप रकम संस्थागत रूपमा घोषणा गर्नुपर्छ ?

नाइमाको ५० लाख रुपैयाँको घोषणाले अटोमोबाइल क्षेत्रमा सामाजिक उत्तरदायित्वको नयाँ मानक खडा गरेको छ। अब नाडाले अन्तिम तीन घण्टामा कति टिकट बिक्री भयो, कति रकम संकलन भयो र कुन आधिकारिक कोषमा कहिले हस्तान्तरण गरियो भन्ने विवरण पारदर्शी रूपमा सार्वजनिक गर्नुपर्नेछ। त्यही विवरणले पछिल्लो घोषणा वास्तविक राहत योगदान हो वा बढ्दो दबाब व्यवस्थापन गर्ने प्रयासमात्र हो भन्ने निर्धारण गर्नेछ।