पूँजीबजारको नियमन र लगानीकर्ता हितबारे अर्थ समितिमा छलफल, नेप्से–सेबोनसहित सरोकारवाला बोलाइयो

काठमाण्डौ । सङ्घीय संसद् प्रतिनिधि सभाको अर्थ समितिले नेपालको पूँजीबजारलाई व्यवस्थित, पारदर्शी, विश्वसनीय तथा लगानीमैत्री बनाउने विषयमा सरोकारवाला निकाय तथा संस्थाहरूसँग छलफल गर्ने भएको छ ।

समितिको ३३औँ बैठक असोज १४ गते बुधबार बिहान ८ः३० बजे सिंहदरबारस्थित सङ्घीय संसद् सचिवालयको समितिको सभाकक्षमा बस्ने भएको हो । समितिले बैठकमा नेपालको पूँजी बजारसँग सम्बन्धित विभिन्न विषयमा छलफल गर्ने कार्यसूची तय गरेको छ ।

बैठकमा विशेषगरी धितोपत्र निष्कासन, सूचीकरण, बजार सञ्चालन तथा नियमन र लगानीकर्ताको हित संरक्षण सम्बन्धमा सम्बन्धित निकाय तथा संघ–संस्थाका प्रतिनिधिसँग छलफल गरिने छ ।

छलफलका लागि अर्थ मन्त्रालयका सचिव, नेपाल धितोपत्र बोर्डका अध्यक्ष, नेपाल स्टक एक्सचेन्ज (नेप्से)का प्रमुख कार्यकारी अधिकृत, सिडिएस एन्ड क्लियरिङ लिमिटेडका प्रमुख कार्यकारी अधिकृत तथा स्टक ब्रोकर एसोसिएसन अफ नेपालका अध्यक्षलाई आमन्त्रण गरिएको छ ।

त्यस्तै, नेपाल सेयरधनी संघ, नेपाल सेयरबजार लगानीकर्ता संघ र नेपाल धितोपत्र लगानीकर्ता संघका अध्यक्षलाई समेत बैठकमा उपस्थित हुन आग्रह गरिएको छ ।

अर्थ समितिको बैठकमा पूँजीबजारको सञ्चालन तथा नियमनसँगै लगानीकर्ताको हित संरक्षणका विषयमा सरोकारवालाका धारणा लिइने अपेक्षा गरिएको छ ।