ट्रम्पद्वारा एआई नीति हेर्न ‘सुपर इन्टेलिजेन्स फोर्स’ गठन

काठमाडौं। अमेरिकी राष्ट्रपति डोनाल्ड ट्रम्पले कृत्रिम बुद्धिमत्ता (एआई) सम्बन्धी नीति तथा गतिविधिको समन्वय गर्न नयाँ कार्यदल गठन गरेका छन्। ‘सुपर इन्टेलिजेन्स फोर्स’ नाम दिइएको उक्त कार्यदलको नेतृत्व राष्ट्रिय गुप्तचर निर्देशक जे क्लेटनले गर्नेछन्।

ट्रम्पका अनुसार अमेरिकाले यो प्रविधिको विकासमा आफ्नो अग्रता कायम राखोस् भन्ने उद्देश्यले कार्यदल गठन गरिएको हो। कार्यदलले यस क्षेत्रमा सरकारको सार्वजनिक सहभागितासमेत समन्वय गर्नेछ।

ट्रम्पले सामाजिक सञ्जालमार्फत कार्यदल गठनको घोषणा गरेका हुन्। यो घोषणा उनले गत २९ सेप्टेम्बरमा एआईलाई ‘सुपर इन्टेलिजेन्स’ नामले सम्बोधन गर्न निर्देशन दिने कार्यकारी आदेशमा हस्ताक्षर गरेको केही दिनपछि आएको हो। यसअघि ट्रम्पले ‘आर्टिफिसियल’ शब्दले प्रविधिलाई ‘नक्कली’ जस्तो सुनाउने बताएका थिए।

गत साता ट्रम्पले एआई सुरक्षाको निगरानी गर्न एउटा बोर्ड गठन गर्ने बताएका थिए। शीर्ष प्रविधि कम्पनीका प्रमुखहरूले उनले ‘नैतिक रूपमा बाध्यकारी’ भनेको एउटा सम्झौतामा हस्ताक्षर गरेपछि उनले यस्तो घोषणा गरेका थिए।

ट्रम्पले लेखेका छन्, “सुपर इन्टेलिजेन्स फोर्सले उपभोक्ता, सार्वजनिक हितका समूह, धार्मिक संस्था, महत्त्वपूर्ण पूर्वाधार प्रदायक तथा सुपर इन्टेलिजेन्स कम्पनीहरूसँग संघीय सरकारको सहभागिताको समन्वय गर्नेछ।”

कार्यदलमा संघीय व्यापार आयोग (एफटीसी)का अध्यक्ष एन्ड्र्यु फर्ग्युसन, रक्षा अनुसन्धान तथा इन्जिनियरिङका उपसचिव एमिल माइकल र कर्मचारी व्यवस्थापन कार्यालयका निर्देशक स्कट कुपोर पनि रहनेछन्।

कार्यदलले प्रत्यक्ष रूपमा राष्ट्रपति ट्रम्प र ह्वाइट हाउसकी प्रमुख कर्मचारी सुसी वाइल्सलाई प्रतिवेदन बुझाउनेछ।

कार्यदलका प्रमुख क्लेटनले गत अगस्टमा अमेरिकी राष्ट्रिय गुप्तचर निर्देशकको जिम्मेवारी सम्हालेका थिए। ट्रम्पले यसअघि उक्त पदका लागि चयन गरेका बिल पुल्टेलाई भने सांसदहरूले अस्वीकार गरेका थिए।