श्रमिकलाई एक महिनाको आधारभूत तलब बराबर ‘चाडपर्व खर्च’ दिन रोजगारदातालाई निर्देशन

काठमाण्डौ ।  श्रम तथा व्यवसायजन्य सुरक्षा विभागले सबै रोजगारदाता तथा प्रतिष्ठानलाई श्रमिकलाई अनिवार्य रूपमा चाडपर्व खर्च उपलब्ध गराउन निर्देशन दिएको छ।

श्रम ऐन, २०७४ को दफा ३७ अनुसार प्रचलित धर्म, संस्कृति तथा परम्पराअनुसार मनाइने चाडपर्वका लागि प्रत्येक श्रमिकले आफूले खाइपाइ आएको एक महिनाको आधारभूत पारिश्रमिक बराबरको रकम प्रत्येक वर्ष चाडपर्व खर्चका रूपमा पाउने कानुनी व्यवस्था रहेको विभागले स्पष्ट पारेको हो।

विभागले रोजगारदाता तथा प्रतिष्ठानलाई उक्त कानुनी व्यवस्था कार्यान्वयन गरी श्रमिकलाई समयमै चाडपर्व खर्च उपलब्ध गराउन आग्रह गरेको छ।

कानुनबमोजिम पाउनुपर्ने चाडपर्व खर्च रोजगारदाता वा प्रतिष्ठानले उपलब्ध नगराए सम्बन्धित श्रमिक वा कामदारले आफ्नो कार्यक्षेत्र पर्ने श्रम तथा रोजगार कार्यालय वा श्रम तथा व्यवसायजन्य सुरक्षा विभागमा उजुरी तथा निवेदन दिन सक्नेछन्।

विभागले उजुरी, गुनासो तथा सुझावका लागि इमेलमार्फत सम्पर्क गर्न सकिने व्यवस्था गरेको छ। साथै, श्रमिकले सहज रूपमा गुनासो तथा उजुरी दिन सकून् भनेर क्यूआर कोडसमेत उपलब्ध गराइएको विभागले जनाएको छ।

विभागले श्रमिकका कानुनी हक सुनिश्चित गर्न तथा श्रम ऐनको प्रभावकारी कार्यान्वयनका लागि रोजगारदातालाई चाडपर्व खर्चसम्बन्धी व्यवस्था पालना गर्न पुनः सचेत गराएको हो।