कात्तिक ११ सम्मको मौसम प्रक्षेपणः हिमालमा हल्का हिमपातको सम्भावना, तराईमा हुस्सु लाग्ने

काठमाण्डौ । देशमा पश्चिमी वायुको आंशिक प्रभाव रहँदा आगामी केही दिन हिमाली क्षेत्रमा हल्का वर्षा तथा हिमपातको सम्भावना देखिएको छ। तराई, उपत्यका र खोँचका केही स्थानमा बिहानपख हुस्सु तथा कुहिरो लाग्ने प्रक्षेपण गरिएको छ। मौसम पूर्वानुमान महाशाखाले कात्तिक ७ गते साँझ ६ बजे जारी गरेको बुलेटिनअनुसार कात्तिक ११ गतेसम्मका लागि कुनै मौसमी चेतावनी भने छैन।

आइतबार र सोमबार कहाँ कस्तो मौसम ? कात्तिक ८ गते आइतबार दिउँसो देशका हिमाली र पहाडी भूभागमा आंशिक बदली रहनेछ भने तराईमा मौसम मुख्यतया सफा रहनेछ। कोशी र गण्डकी प्रदेशका हिमाली भूभागका एक–दुई स्थानमा हल्का वर्षा तथा हिमपातको सम्भावना छ। आइतबार राति कोशी, बागमती, गण्डकी र कर्णाली प्रदेशका हिमाली क्षेत्रमा आंशिक बदली रहनेछ। बाँकी हिमाली तथा पहाडी भूभागमा मौसम मुख्यतया सफा रहने प्रक्षेपण छ। तराई, उपत्यका तथा खोँचहरूमा बिहानपख केही स्थानमा हुस्सु तथा कुहिरो लाग्नेछ। कात्तिक ९ गते सोमबार पनि हिमाली र पहाडी क्षेत्रमा आंशिक बदली तथा तराईमा मुख्यतया सफा मौसम रहनेछ। कोशी प्रदेशका हिमाली भूभागका एक–दुई स्थानमा हल्का वर्षा तथा हिमपातको सम्भावना छ। सोमबार राति कोशी, बागमती, गण्डकी र कर्णालीका हिमाली क्षेत्रमा आंशिक बदली रहनेछ। तराई, उपत्यका तथा खोँचका केही स्थानमा बिहानपख हुस्सु तथा कुहिरो लाग्ने अनुमान छ। मंगलबार र बुधबार बदली बढ्ने महाशाखाका अनुसार कात्तिक १० र ११ गते अर्थात् मंगलबार र बुधबार देशभर आंशिक बदली रहनेछ। यी दुई दिन कोशी, बागमती र गण्डकी प्रदेशका हिमाली भूभागका एक–दुई स्थानमा हल्का वर्षा तथा हिमपातको सम्भावना छ। हाल देशका हिमाली र पहाडी भूभागमा आंशिक बदली छ भने तराईमा मौसम मुख्यतया सफा रहेको महाशाखाले जनाएको छ। कात्तिक ११ गतेसम्म कुनै मौसमी चेतावनी नरहे पनि महाशाखाले सर्वसाधारण तथा सम्बन्धित निकायलाई पछिल्लो मौसमी सूचना र पूर्वानुमान नियमित रूपमा जानकारी लिन अनुरोध गरेको छ।