एनभिडियाको सेयर खस्दा हुआङको सम्पत्ति ६ अर्ब ८० करोड डलर घट्यो, धनी सूचीमा दसौं स्थानमा

काठमाण्डौ । एआई चिप निर्माता एनभिडियाका सहसंस्थापक तथा प्रमुख कार्यकारी अधिकृत जेन्सेन हुआङको अनुमानित खुद सम्पत्ति ६ अर्ब ८० करोड अमेरिकी डलर घटेको छ। फोर्ब्सको रियलटाइम अर्बपति सूचीको पछिल्लो विवरणमा उनको सम्पत्ति १५५ अर्ब ४० करोड डलर छ र उनी विश्वका धनी व्यक्तिको सूचीमा दसौं स्थानमा छन्।

सोमबार अमेरिकी बजार खुलेको पहिलो आधा घण्टामै उनको अनुमानित सम्पत्ति ७ अर्ब ४० करोड डलर घटेर १५४ अर्ब ७० करोड डलरमा झरेको थियो। त्यही बेला उनी आठौंबाट दसौं स्थानमा पुगे। कारोबारका क्रममा एनभिडियाको सेयर न्यून विन्दुबाट केही फर्किएपछि हुआङको सम्पत्तिमा देखिएको गिरावट पनि केही साँघुरियो।

एनभिडियाको सेयर एक डलर चल्दा हुआङको हिस्सामा कति फरक पर्छ ?

शुक्रबार १८६.६४ डलरमा बन्द भएको एनभिडियाको सेयर सोमबार कारोबारका क्रममा १७०.२४ डलर सम्म झर्‍यो। त्यसपछि केही सम्हालिएर १७८.६७ डलर मा बन्द भयो। दिनको अन्त्यमा सेयरमूल्य ७.९७ डलर अर्थात् ४.२७ प्रतिशत घटेको थियो। रोयटर्सका अनुसार यसले कम्पनीको बजार पुँजीकरण करिब १९० अर्ब डलर घटायो। त्यही दिन एसएन्डपी ५००, डाउ जोन्स र नास्डाक कम्पोजिट भने तीनै सूचक बढेर बन्द भए।

अमेरिकी धितोपत्र नियामकसमक्ष एनभिडियाले बुझाएको सन् २०२६ को विवरणमा हुआङको लाभकारी स्वामित्वमा ८७ करोडभन्दा बढी सेयर थिए। त्यो कम्पनीको ३.५८ प्रतिशत हो। उक्त सेयर संख्या आधार मान्दा एनभिडियाको मूल्य प्रतिकित्ता एक डलर घटबढ हुँदा उनको सेयर हिस्साको बजार मूल्य मात्रै करिब ८७ करोड डलर ले बदलिन्छ। फोर्ब्सको सम्पत्ति अनुमानमा देखिएको गिरावट पनि मुख्यतः यही सेयर हिस्साको बजार मूल्यसँग जोडिएको छ।

हुआङको स्वीकारोक्ति र जासुसीको आरोप

हुआङले आइतबार कर्मचारीलाई पठाएको सन्देशमा विवाहबाहिरको सम्बन्ध स्वीकार गर्दै परिवार र सहकर्मीसँग क्षमा मागेका थिए। उनले सम्बन्धमा जोडिएकी व्यक्तिको नाम खुलाएनन्। द न्यूयोर्क टाइम्सले भने ती व्यक्तिलाई सिंगापुरस्थित डेटा सेन्टर कम्पनी मेगास्पिडकी पूर्वकार्यकारी एलिस हुआङ का रूपमा पहिचान गरेको छ। उक्त पत्रिकाको रिपोर्टअनुसार अमेरिकी गुप्तचर निकायले एलिसले बेइजिङका लागि सूचना संकलन गरेको ठहर गरेका थिए। चीनको विदेश मन्त्रालयले आरोप अस्वीकार गरेको छ। 

मेगास्पिड एनभिडियाको ग्राहक हो। द न्यूयोर्क टाइम्सलाई उद्धृत गर्दै एसोसिएटेड प्रेसले मेगास्पिडले दुई वर्षमा एनभिडियाबाट ४ अर्ब ८० करोड डलरभन्दा बढीका चिप किनेको जनाएको छ। अमेरिकाले चीनमा उन्नत एआई चिप पठाउन लगाएका प्रतिबन्धबीच मेगास्पिडले ती चिपमा चिनियाँ पहुँच सहज बनाएको आशंकामा अमेरिकी अधिकारीहरूले यसअघि नै कम्पनीमाथि निगरानी गरेका थिए।

बोर्डको छानबिनसँगै कंग्रेस र अदालतमा पनि प्रश्न

एनभिडियाको सञ्चालक समितिले हुआङ विदेशी गुप्तचर गतिविधिको निशानामा परेका थिए कि थिएनन् भन्ने जाँच्न स्वतन्त्र छानबिन सुरु गरेको छ। बाह्य कानुनी सल्लाहकारको सहयोगमा स्वतन्त्र सञ्चालकहरूको समितिले उपलब्ध सूचना जाँच्नेछ। बोर्डले अमेरिकी राष्ट्रिय सुरक्षा वा कम्पनीका गोप्य सूचना प्रभावित भएको ठान्ने आधार अहिलेसम्म नरहेको जनाएको छ। हुआङ सीईओ पदमा छन् र छानबिनमा सहयोग गर्ने बताएका छन्।

अमेरिकी प्रतिनिधिसभाका तीन समितिका अध्यक्षले हुआङलाई नोभेम्बर १८ मा बन्द बैठकमा उपस्थित भएर एलिससँगको सम्पर्क र कम्पनीको सूचना सुरक्षा व्यवस्थाबारे जानकारी दिन आग्रह गरेका छन्। सोमबार बजार बन्द भएपछि क्यालिफोर्नियाको संघीय अदालतमा एनभिडिया र हुआङविरुद्ध सामूहिक मुद्दाका रूपमा अघि बढाउन माग गरिएको उजुरी पनि दर्ता भयो। उजुरीकर्ताले कम्पनीले सम्बन्ध र त्यससँग जोडिएको जोखिमबारे लगानीकर्तालाई पर्याप्त जानकारी नदिएको आरोप लगाएका छन्।