भिडियो कलबाट ४० करोड डलरको क्रिप्टो चोरी, उत्तर कोरियाली ह्याकरमाथि आरोप

काठमाडौं। अमेरिकी अधिकारीहरूले ४० करोड डलरभन्दा बढी मूल्यको क्रिप्टोकरेन्सी चोरीमा उत्तर कोरियाली सरकारसँग सम्बन्धित ह्याकरहरूको संलग्नता रहेको दाबी गरेका छन् । उनीहरूले नक्कली भिडियो कलमार्फत व्यक्तिको पहिचान चोरी गरी यो ठगी गरेको अधिकारीहरूको भनाइ छ ।

अमेरिकी संघीय अनुसन्धान ब्युरो (एफबीआई)का अनुसार पछिल्लो १८ महिनामा ९०० भन्दा बढी व्यक्ति यस किसिमको ठगीमा परेका छन् । अनुसन्धान निकायले ठगीको यस विधिलाई ‘फेसस्टिलर’ नाम दिएको छ ।

एफबीआईका साइबर निर्देशक ब्रेट लिथम्यानले उत्तर कोरियाली शासनले आफ्नो अवैध हतियार कार्यक्रम सञ्चालन गर्न क्रिप्टोकरेन्सी चोरीबाट प्राप्त ठूलो रकममा निर्भर रहेको बताएका छन् । उनका अनुसार पछिल्ला वर्षहरूमा उत्तर कोरियाली ह्याकरहरूले अर्बौं डलर बराबरको क्रिप्टोकरेन्सी चोरी गरेका छन् ।

यो घटना विश्वकै ठूलो क्रिप्टो एक्सचेन्ज बाइनान्सले ६.३ अर्ब डलर (करिब ५९ हजार २५६ करोड रुपैयाँ) बराबरको क्रिप्टोकरेन्सी चोरी भएको दाबी गरेको एक सातापछि सार्वजनिक भएको हो । बाइनान्सका अनुसार ह्याकरहरूले नक्कली रोजगारी अन्तर्वार्ताको माध्यमबाट उक्त रकम चोरी गरेका थिए ।

अमेरिकी कानुन कार्यान्वयन निकायहरूले बाइनान्समा भएको उक्त आक्रमणमा पनि उत्तर कोरियासँग सम्बन्धित ह्याकरहरू जिम्मेवार रहेको आरोप लगाएका छन् । उक्त घटनालाई हालसम्मकै सबैभन्दा ठूलो क्रिप्टो ह्याक मानिएको छ । तर, उत्तर कोरियाले भने आफूमाथि लागेको आरोप अस्वीकार गर्दै आएको छ ।