बिक्न छाडेपछि सेरेस थ्रीको रिब्राण्डिङ: यूरोपमा 'खत्तम इभी'को उपमा, नेपालमा भ्रमको खेती

काठमाण्डौ । समस्यै समस्या देखिएको विद्युतीय गाडी सेरेस ३ मा ग्राहकको चासो घट्न थालेपछि रि ब्राण्डिङ गर्न एमएडब्ल्यू वृद्धि बाध्य भएको छ ।  

एमएडब्ल्यू वृद्धिले सेरेस–३ गाडी यसअघि भित्र्याएर भ्रम छर्दै केही गाडी बिक्री गर्ने सफलता पाएको थियो । तर, बिक्री भएका गाडीहरुमा एकपछि अर्को समस्या देखिएपछि ग्राहकहरु हैरानीमा पर्दै आएका छन् । सेरेस थ्रीको ब्राण्ड नाम नै नेपालमा बिग्रिएपछि कम्पनीले नयाँ मोडेलको गाडी भन्दै सेरेस थ्रीको रिब्राण्डिङ गरेको हो । 

Sponsored

Sponsored

Sponsored

रिब्राण्डिङसँगै कम्पनीले नेपालमा बिक्रीवितरण हुने गाडीको मूल्य समेत पहिलाको तुलनामा बढाएको छ । पहिला ४८ लाख रुपैयाँ हाराहारीमा रहेको सुरुवाती मूल्य अहिले बढाएर ५० लाख पुर्याइएको छ । पहिलाको तुलनामा २ लाख रुपैयाँले गाडीको मूल्य बढाइएको छ। त्यसै पनि समस्यै समस्या देखिएका कारण ग्राहक असन्तुष्ट बनेका र त्यसमाथि मूल्य बढाउँदा ग्राहकहरुले भने यो गाडीको विषयमा ध्यान दिन छाडेका एमएडब्ल्यूकै एक कर्मचारीले बताए । ‘सेरेसको ब्राण्ड नै खराब भएका कारण अहिले यो गाडी बिक्री गर्न कठीन छ । बुकिङ पनि एकदमै कम छ ।’ ती कर्मचारीले बिजशालासँग भने–‘यो गाडीको बिग्रिएको ब्राण्ड सुधार्न कम्पनीले विभिन्न हत्कण्डा प्रयोग त गरेको छ, तर यसको प्रभाव पर्लाजस्तो देखिएको छैन।’ 

चीनमा बनेको इलेक्ट्रिक एसयूभी सेरेस थ्रीमा निकै धेरै समस्याहरु छन् । यिनै गाडी यूरोपियन बजारमा समेत पुगेका छन्, तर त्यहाँ एकपछि अर्को समस्या आएका कारण बिक्री अत्यन्त न्यून छ । यूरोपियन बजारमा उपलब्ध कतिपय इभी विज्ञहरुले त ब्लग नै लेखेर हदैसम्मको दुःख पाउने हो भने मात्र सेरेस थ्री लिनु भन्नेसम्मको सुझाव दिएका छन् । यूरोपमा ‘सबैभन्दा गुणस्तरहीन र खत्तम इभी एसयूभी’को उपमा पाएको गाडीलाई विष्णुकुमार अग्रवालको कम्पनीले भने नेपालमा रिब्राण्डिङ गर्दै बिक्री बढाउन खोजिरहेको हो ।    

एमए डब्ल्यू वृद्धिले नेपालमा यसअघि सेरेस थ्रीका करिब २०० बढी युनिट बिक्री गरिसकेको थियो । त्यसबेला भ्रमपूर्ण विज्ञापनको पछि लागेर नेपालीहरुले गाडी किनेका थिए । तर, बिक्रीपछिको सेवामा भने ग्राहकले निकै ठूलो लफडा भोग्दै आएका छन् । गाडीमा एकपछि अर्को समस्या उस्तै गरी बढ्यो भने पीडामा परेकाहरुले न्याय पाउनका लागि मिडियालाई गुहार्नेसम्मको अवस्था आइलाग्यो । ती पीडितहरुको समस्या समाधान भन्दा पनि कम्पनीले भने फेरि पनि भ्रमपूर्ण प्रचारप्रसारमै ध्यान दिएको पाइएको छ ।  

कम्पनीले सेरेस थ्रीमा २० प्रतिशतभन्दा बढी मार्जिन राखेर नयाँ मूल्य कायम गरेको छ । ४० लाख हाराहारीमा कम्पनीकै लागत पर्नेमा प्रत्येक गाडीमा १० लाख रुपैयाँ मार्जिन राखिएको छ ।  

नेपालमा आयात गरेको सामानमा परेको मूल्य(खर्च समेत जोडी)को २० प्रतिशतभन्दा बढी मार्जिन राख्न नपाइने कानूनी व्यवस्था रहेको छ । एमएडब्ल्यू वृद्धिले भने यस्तो कानूनी व्यवस्थाको धज्जी उडाउँदै सेरेसको मूल्यमा २५ प्रतिशत मार्जिन राखेको पाइएको छ ।  

यही कम्पनीले भित्र्याएको टेस्लाको साइबर टकको कपीजस्तो देखिने दिपल ७ को मूल्यमा त ब्रम्हलुट नै गरिएको छ । (दिपलको मूल्यमा भएको ब्रम्हलुटसम्बन्धी समाचार अर्को अंकमा)।  

लण्डनको एक चर्चित पत्रिकाका सम्पादकले सेरेस थ्री इभीको विषयमा लेखेको यो ब्लग पनि पढ्नुस् :

Seres 3: Why this Chinese SUV is the worst EV I’ve driven