धितोपत्र बोर्डको अध्यक्ष छनौटका लागि पुरानै प्रक्रिया यथावत राख्ने आदेशलाई सर्वोच्चद्वारा निरन्तरता

काठमाण्डौ । नेपाल धितोपत्र बोर्डको अध्यक्ष नियुक्तिविरुद्ध परेको रिटमा सर्वोच्च अदालतले अल्पकालीन आदेशलाई नै निरन्तरता दिएको छ ।  

सर्वोच्च अदालतका न्यायाधीश सपना प्रधान मल्ल र बालकृष्ण ढकालको संयुक्त इजलासले गत असार १८ गते जारी अल्पकालीन अन्तरिम आदेशलाई निरन्तरता दिएको हो ।

गत मंगलबार सर्वोच्च अदालतका न्यायाधीश अब्दुल अजिज मुसलमानको एकल इजलासले धितोपत्र बोर्डको अध्यक्षका एक उम्मेद्वार सन्तोषनारायण श्रेष्ठले दिएको रिटमाथि प्रारम्भिक सुनुवाई गर्दै पुरानो प्रक्रिया रद्द नगर्न सरकार र सम्बद्ध सरोकारवालाको नाममा अल्पकालीन अन्तरिम आदेश दिएका थिए । 

सेबोन अध्यक्षका लागि सर्टलिस्टेड अन्तिम ५ जनामध्ये ३ जना उम्मेद्वार अन्तर्वार्ता तथा कार्यपत्र प्रस्तुतिकरणमा अनुपस्थित भएको भन्दै सरकारले छनौट प्रक्रिया नै रद्द गरेको थियो । यसका लागि अध्यक्ष छनौट समितिले महान्यायाधिवक्ता कार्यालयको कानूनी राय समेत मागेको थियो । महान्यायाधिवक्ता कार्यालयले समितिलाई  २ जनाको नाम सिफारिस गर्न नमिल्ने र कम्तीमा ३ जनाको नाम सिफारिस गर्न सक्ने सुझाव दिएको थियो ।

धितोपत्र बोर्डको अध्यक्षको दाबेदार मध्येका एक, सन्तोष नारायण श्रेष्ठ अध्यक्ष नियुक्ती प्रक्रिया रद्द गर्ने निर्णय विरुद्ध सर्वोच्च अदालत गएका थिए । उनले प्रक्रिया रद्द गर्न नमिल्ने दाबी गर्दै सर्वोच्चमा रिट दायर गरेका थिए ।