जापानको सेयर बजारमा लगातार ६ दिन गिरावट, आज पनि ३% को पहिरो

काठमाण्डौ । जापानको सेयर बजारमा ६ दिन लगातार गिरावट आएको छ । आज पनि जापानको निक्की२२५ इन्डेक्स ३ प्रतिशतले ओरालो लागेको छ । आज एशियाली बजारहरुमध्ये जापानको सेयर बजारमा सर्वाधिक गिरावट आएको छ ।

आज निक्की२२५ इन्डेक्स ३ प्रतिशत अर्थात १ हजार १६८.२३ अंकले घटेको छ । यो गिरावटसँगै आज निक्की२२५ ३७ हजार ९९७.७१ विन्दुमा सीमित बनेको छ । आज सफ्ट बैंक ग्रुपको सेयरमूल्य ७ प्रतिशत र रेनिसास इलेक्ट्रोनिक्सको मूल्य १४ प्रतिशतले घटेको छ ।

यस्तै आज टोपिक्स इन्डेक्स पनि २.२४ प्रतिशतले घटेको छ ।

आज जापानको मुद्रा येन लगातार चौथो दिन डलरको तुलनामा बलियो बनेको छ । आज एक अमेरिकी डलरबराबर १५३.०९ येन कायम भएको छ । जापानको केन्द्रीय बैंकले आगामी मौद्रिक नीतिमार्फत ब्याजदर बढाउने विषयमा छलफल बढाएपछि जापानको सेयर बजारमा गिरावट आएको छ ।