४२ जिल्लाका ६३ स्थानमा खुल्यो सहुलियत पसल, के–के मा पाइन्छ छुट ?

काठमाण्डौ । सरकारले दशैं लक्षित सहुलियत पसल सञ्चालन गरेको छ । खाद्य व्यवस्था तथा व्यापार कम्पनीले आजदेखि देशका ४२ जिल्लाका ६३ स्थानमा सहुलियत पसल सञ्चालन गरेको हो ।  

उद्योग, वाणिज्य तथा आपूर्ति मन्त्रालयले गत २३ गते गरेको निर्णयबमोजिम सहुलियत पसल सञ्चालनमा ल्याएको हो । खाद्य व्यवस्था तथा व्यापार कम्पनीले हरेक वर्ष चाडपर्वलक्षित सहुलियत पसल सञ्चालन गर्दै आएको छ ।  

काठमाण्डौ उपत्यकाका ४ स्थान थापाथली, रामशाहपथ, नख्खु र सूर्यविनायकमा सहुलियत पसल सञ्चालन गरिएको छ ।  

सरकारले चाडपर्वमा बढी प्रयोग हुने खाद्यान्न सामाग्रीहरु चामल, दाल, तेल, सिमी, गेडागुडी र घिउ र खसीबोका र च्याङ्ग्राहरु समेत बिक्री गर्दै आइरहेको छ ।  

कम्पनीका अनुसार यसवर्षको सहुलियत पसलमा खाद्यान्न परिकारमा प्रतिकेजी ७ रुपैयाँसम्म, खसीबोकामा प्रतिकेजी १० रुपैयाँसम्म र दुग्धजन्य पदार्थमा ७ रुपैयाँसम्म छुट दिइनेछ ।    

सहुलियत पसलमा ग्राहकहरुले सबै प्रकारका चामलमा प्रतिकेजी ५ रुपैयाँ र कर्णालीको रैथाने चामलमा भने ७ रुपैयाँ छुट पाउने कम्पनीले जनाएको छ । यसका साथै खाने तेलमा प्रतिलिटर ७ रुपैयाँ, दालमा प्रतिकिलो ५ रुपैयाँ, कर्णालीको दाल र सिमीमा प्रति केजी ७ रुपैयाँ, गेडागुडीमा प्रतिकेजी ७ रुपैयाँ, घिउमा प्रतिकेजी ७ रुपैयाँ र चिनीमा प्रतिकेजी ५ रुपैयाँ छुट दिने कम्पनीले जनाएको छ ।  

साथै यसपटकको दशैंमा कम्पनीले १५ सय खसीबोका, ३०० वटा च्याङ्ग्रा  र ५० क्विन्टल खाद्यान्न सामाग्री बिक्रीमा राख्ने जनाएको छ । कम्पनीका अनुसार सहुलियत पसल देशका विभिन्न ६१ वटा स्थानमा सञ्चालनमा आउनेछन् ।